ఇమ్రాన్ కంటి చూపు కోల్పోయే ప్రమాదం..!

పాకిస్థాన్ మాజీ ప్రధాని ఇమ్రాన్ ఖాన్ ఆరోగ్యానికి సంబంధించి పెద్ద వార్త వెలుగులోకి వచ్చింది. డాన్ నివేదిక ప్రకారం.. ఇమ్రాన్ ఖాన్ తన కంటి చూపును శాశ్వతంగా కోల్పోవచ్చని అతడి పార్టీ పాకిస్తాన్ తెహ్రీక్-ఇ-ఇన్సాఫ్ (పిటిఐ) పేర్కొంది. ఈ విషయమై సోషల్ మీడియా ప్లాట్‌ఫామ్ 'ఎక్స్'లో పార్టీ ఓ ప్రకటన విడుదల చేస్తూ తీవ్ర ఆందోళన వ్యక్తం చేసింది.

పిటిఐ ప్రకారం.. ఇమ్రాన్ ఖాన్ కుడి కంటిలో 'సెంట్రల్ రెటీనా వెయిన్ అక్లూజన్' సమస్య ఉందని వైద్య నివేదిక వెల్లడించింది. ఇది చాలా తీవ్రమైన పరిస్థితి.. కంటి సిరలో ప్రమాదకరమైన అడ్డంకి ఏర్పడుతుంది. తక్షణం, సరైన చికిత్స చేయకపోతే.. ఆయ‌న‌ చూపు శాశ్వతంగా కోల్పోయే ప్రమాదం ఉందని వైద్యులు హెచ్చరించారు. ఈ తీవ్రమైన వ్యాధిని జైలు అధికారులు పట్టించుకోవడం లేదని పార్టీ ఆరోపించింది. ఈ వ్యాధి చికిత్సకు ప్రత్యేక ఆపరేషన్ థియేటర్, ఆధునిక సౌకర్యాలు అవసరమని నిపుణులు చెబుతున్నారు. అయినప్పటికీ, అడియాలా జైలులోనే అతనికి చికిత్స చేయాలని జైలు యంత్రాంగం పట్టుబట్టింది. ఇది నిర్లక్ష్య వైఖరి అని పిటిఐ పేర్కొంది.

ఇమ్రాన్ ఖాన్ ఆరోగ్యం, కంటి చూపు రెండూ పెను ప్రమాదంలో ఉన్నాయని పార్టీ చెబుతోంది. అక్టోబర్ 2024 తర్వాత ఇమ్రాన్ ఖాన్ తన వ్యక్తిగత వైద్యుడిని కలవడానికి అనుమతించలేదని కూడా ప్రకటన పేర్కొంది. ఇస్లామాబాద్‌ హైకోర్టు ఆదేశాలు జారీ చేసినప్పటికీ అతడికి వైద్య పరీక్షలు నిర్వహించలేదు. 2025 ఆగస్టు నుంచి రెగ్యులర్ దర్యాప్తును కోరుతూ దాఖలైన పిటిషన్ పెండింగ్‌లో ఉందని పార్టీ పేర్కొంది. ఇది మానవ హక్కుల ఉల్లంఘన అని.. రాజకీయ ప్రతీకారం అని PTI పేర్కొంది.

ఇమ్రాన్ ఖాన్ నిర్మించిన షౌకత్ ఖానుమ్ హాస్పిటల్ కూడా ఆయన ఆరోగ్యంపై ఆందోళన వ్యక్తం చేసింది. ఇమ్రాన్ ఖాన్‌ను పరీక్షించేందుకు తమ వైద్య బృందాన్ని అనుమతించాలని ఆసుపత్రి కోరింది. ఆయ‌న‌ శ్రేయస్సు కోసం తాము పాలుపంచుకుంటామ‌ని ఆసుపత్రి నిర్వాహకులు కోరుకుంటున్నారు.

మరోవైపు, ఈ వార్తల వాస్తవికతను ప్రశ్నిస్తూ ఇమ్రాన్ ఖాన్ సోదరీమణులు జైలు వెలుపల ప్రదర్శన చేశారు. భయాందోళనల వాతావరణాన్ని సృష్టించేందుకు ఉద్దేశపూర్వకంగా ఏదో ఒక ఏజెన్సీ ఈ వార్తను లీక్ చేసిందని అలీమా ఖానుమ్, నోరీన్ ఖానుమ్ ఆరోపించారు. ఎందుకంటే కుటుంబ సభ్యులకు ఎలాంటి అధికారిక సమాచారం అందలేదని అంటున్నారు.