ముఖ్యాంశాలు

  • హబీబ్‌నగ్‌ పీఎస్‌ పరిధిలో విషాదం
  • కేసు నమోదు చేసి దర్యాప్తు చేస్తున్న పోలీసులు
  • మృతదేహాలు ఉస్మానియా ఆస్పత్రికి తరలింపు

హైదరాబాద్‌: హబీబ్‌నగర్‌ పోలీస్‌స్టేషన్ పరిధిలో ఘోర విషాద ఘటన చోటు చేసుకుంది. గురువారం రాత్రి మంగర్‌ బస్తీలోని అప్జల్‌ సాగర్‌ వీధిలో ఉన్నట్టుంది ఒక్కసారిగా ప్రహరీ గోడ కూలింది. ఈ ప్రమాదంలో ఒకే కుటుంబానికి చెందిన ముగ్గురు చిన్నారులు నిద్రిస్తుండగానే దుర్మరణం చెందారు. మృతులు వివరాలు.. రోషిని (6), పావని(4), సారిక(4). ఈ ఘటనతో అప్జల్‌ సాగర్‌ వీధిలో విషాదఛాయలు అలుముకున్నాయి. చిన్నారులు ఇంట్లో నిద్ర పోతుంటే.. పెద్దవాళ్లు ఇంటి బయట కూర్చొని మాట్లాడుకుంటుండగా ఈ ప్రమాదం జరిగినట్లు తెలిసింది. మరో చిన్నారి మూడేళ్ల గీత తీవ్రంగా గాయపడగా వెంటనే ఆస్పత్రికి తరలించారు.

స్థానికులు సమాచారం మేరకు పోలీసులు, క్లూస్‌ టీమ్‌, జీహెచ్‌ఎంసీ డిజాస్టర్‌ టీమ్‌లు సంఘటనా స్థలానికి చేరుకున్నాయి. చిన్నారుల మృతదేహాలను ఉస్మానియా ఆస్పత్రికి తరలించారు. ఈ ఘటనపై కేసు నమోదు చేసుకున్న పోలీసులు విచారణ జరుపుతున్నారు. ప్రమాదానికి గల కారణాలపై పలు కోణాల్లో దర్యాప్తు ముమ్మరం చేశారు. ఒకే కుటుంబానికి చెందిన ముగ్గురు చిన్నారులు మృతి చెందడంతో ఆ కుటుంబం కన్నీరుమున్నీరవుతోంది. కన్నబిడ్డలు తిరిగిరానిలోకాలకు వెళ్లిపోవడంతో చిన్నారుల తల్లిదండ్రులు గుండెలవిసేలా రోదిస్తున్నారు. పసిపిల్లలతో కళకళాడాల్సిన ఆ ఇళ్లు ఇప్పుడు మూగబోయింది.

అంజి గోనె

నా పేరు గోనె. అంజి. న్యూస్‌మీటర్‌ తెలుగులో జర్నలిస్టుగా పని చేస్తున్నాను. గతంలో 99టీవీలో క్షేత్రస్థాయి అధ్యయనం చేశాను. మోజో టీవీలో సంవత్సరం పాటు జర్నలిస్టుగా పనిచేశాను. కలం నా బలం, సమస్యలే నా గళం. జర్నలిజం పట్ల ఇష్టంతో నేను ఈ వృత్తిని ఎంచుకున్నాను.