దీదీని కలిసిన బీహార్ సీఎం, డిప్యూటీ సీఎం.. అంద‌రూ క‌లిసి బీజేపీపై..

ప‌శ్చిమ‌ బెంగాల్ ముఖ్య‌మంత్రి మమతా బెనర్జీని కోల్‌కతాలో బీహార్ సీఎం నితీశ్ కుమార్, డిప్యూటీ సీఎం తేజస్వీ యాదవ్ కలిశారు. రాష్ట్ర సచివాలయం 'నబన్న'లో దీదీని కలిసిన అనంతరం సంయుక్తంగా విలేకరుల సమావేశంలో మాట్లాడుతూ.. మా మధ్య చాలా మంచి విషయం జరిగింది. అవసరాన్ని బట్టి భవిష్యత్తులో ఇతర పార్టీలను ఏకతాటిపైకి తెచ్చి చర్చలు జరుపుతామ‌ని మమతా బెనర్జీ అన్నారు. దేశ ప్రజలు బీజేపీకి వ్యతిరేకంగా పోరాడుతారన్నారు. అభివృద్ధి గురించి నితీష్‌తో మాట్లాడినట్లు మమత తెలిపారు. రాజకీయాలపైనా చర్చ జరిగిందని వెల్ల‌డించారు.

బీహార్ లో అఖిలపక్ష సమావేశాన్ని నిర్వహించుకుంటే.. తదుపరి ఎక్కడికి వెళ్లాలో నిర్ణయించుకోగలమని.. నేను నితీష్ కుమార్‌కు ఒకే ఒక అభ్యర్థన చేశాను. ముందుగా మనం ఒక్కటే అనే సందేశం ఇవ్వాలని దీదీ అన్నారు. నాకేమీ అభ్యంతరం లేదని ముందే చెప్పాను. నాకు ఎలాంటి ఇగో లేదు. బీజేపీ జీరో అవ్వాలని కోరుకుంటున్నాను. మీడియా అండతో, అబద్ధాలతో పెద్ద హీరోలయ్యారని బీజేపీని ఉద్దేశించి వ్యాఖ్య‌లు చేశారు.

బీజేపీ విష‌యంలో అందరూ అప్రమత్తంగా ఉండాలని నితీశ్ కుమార్ అన్నారు. అందుకే అందరితో చర్చలు జరుపుతున్నాం. మమతాతో నాకు పాత పరిచ‌యం ఉందని నితీష్ అన్నారు. లోక్‌సభ ఎన్నికలకు వీలైనంత వరకు కలిసి రావాలని పిలుపునిచ్చారు. కోల్‌కతాలో పశ్చిమ బెంగాల్ ముఖ్యమంత్రి మమతా బెనర్జీతో జరిగిన సమావేశంలో బీహార్ ప్రభుత్వ మంత్రి సంజయ్ ఝా కూడా పాల్గొన్నారు. దీదీతో భేటీ అనంతరం ముగ్గురు నేతలు ఉత్తరప్రదేశ్ వెళ్లనున్నారు. ఇక్కడ సమాజ్‌వాదీ పార్టీ అధినేత అఖిలేష్ యాదవ్‌తో ప్రతిపక్షాల ఐక్యతపై నితీశ్ కుమార్ చర్చించనున్నారు.