కొత్త మార్గదర్శకాలు.. చనిపోయిన నాలుగు గంటల్లోగా పోస్ట్ మార్టం చేయాల్సిందే..!

కుటుంబంలో ఓ వ్యక్తి మరణించాడంటే ఆ విషాదం వర్ణణాతీతం. ఇక ఏదైనా ప్రమాదాల తర్వాత పోస్టు మార్టం కోసం కొన్ని కొన్ని సార్లు కొన్ని గంటలు, కొన్ని చోట్ల అయితే ఏకంగా రోజుల తరబడి ఎదురుచూడాల్సి వస్తూ ఉంటుంది. ఇలాంటి పరిస్థితుల్లో ఆయా కుటుంబాలు కుంగిపోతూ ఉంటాయి. ఉత్తరప్రదేశ్ ఉప ముఖ్యమంత్రి బ్రజేష్ పాఠక్ పోస్ట్‌మార్టం ప్రక్రియలను గరిష్టంగా నాలుగు గంటల్లో పూర్తి చేయాలని ఆదేశించారు. మృతదేహాల కోసం వేచి ఉన్నప్పుడు కుటుంబాలు ఎదుర్కొనే భావోద్వేగాన్ని గుర్తించి, ఈ ప్రక్రియను మరింత మానవీయంగా, సమర్థవంతంగా చేయడానికి ఈ నిర్ణయం తీసుకున్నారు. ఈ సూచనల మేరకు, ఆరోగ్య శాఖ ప్రిన్సిపల్ సెక్రటరీ పార్థ సార్తి సేన్ శర్మ అన్ని పోస్ట్‌మార్టం కేంద్రాలలో ఈ వ్యవస్థను అమలు చేయడానికి రాష్ట్రవ్యాప్తంగా కొత్త మార్గదర్శకాలను జారీ చేశారు.

కొత్త నిబంధనల ప్రకారం.. పోస్ట్‌మార్టం కేసుల సంఖ్య ఎక్కువగా ఉన్న జిల్లాల్లో చీఫ్ మెడికల్ ఆఫీసర్లు (CMOలు) రెండు లేదా అంతకంటే ఎక్కువ అంకితమైన వైద్యుల బృందాలను నియమించాలి. అధికారిక ప్రకటన ప్రకారం ఇది ప్రక్రియను వేగవంతం చేయడానికి, దుఃఖంలో ఉన్నవారి కోసం వేచి ఉండే సమయాన్ని తగ్గించడానికి సహాయపడుతుంది.