'అమెరికా, చైనాలు భారత్‌ డేటాను మాత్రమే కోరుకుంటున్నాయి' : రాహుల్ గాంధీ

లోక్‌సభలో కేంద్ర బడ్జెట్‌పై చర్చ సందర్భంగా ప్రతిపక్ష నాయకుడు రాహుల్ గాంధీ కేంద్ర ప్రభుత్వం, బడ్జెట్ దిశపై పదునైన ప్రశ్నలను లేవనెత్తారు. అమెరికా, చైనా మధ్య నేటి పోటీలో అత్యంత విలువైనది భారతదేశ డేటా అని రాహుల్ గాంధీ అన్నారు. అమెరికా ప్రపంచ సూపర్ పవర్‌గా కొనసాగి తన డాలర్ విలువను కాపాడుకోవాలనుకుంటే, దానికి భారతీయ డేటా అతిపెద్ద కీలకమని ఆయన హెచ్చరించారు. విదేశీ శక్తులు మన డేటాను దొంగిలించడానికి వేచి చూస్తున్నందున, మనం ఎట్టి పరిస్థితుల్లోనూ మన డేటాను సురక్షితంగా ఉంచుకోవాలని రాహుల్ నొక్కి చెప్పారు.

రాహుల్ గాంధీ తన ప్రసంగం ప్రారంభంలో "జిజిట్సు" అనే యుద్ధ కళను ఆసక్తికరమైన ఉదాహరణగా ఉదహరించారు. యుద్ధ కళలలో పట్టులు, ఉక్కిరిబిక్కిరి చేయడం స్పష్టంగా కనిపిస్తాయని, రాజకీయాల్లో అవి కనిపించవని ఆయన అన్నారు. రాజకీయ ఒత్తిడి ఎక్కడ ఉందో, ఎక్కడ అణచివేయబడుతుందో గుర్తించడం కష్టం. ఆర్థిక సర్వేలను ఉటంకిస్తూ.. అమెరికా కేంద్రంగా పనిచేస్తున్న ప్రపంచ వ్యవస్థ ఇప్పుడు రష్యా, చైనా నుండి తీవ్రమైన సవాలును ఎదుర్కొంటోందని ఆయన అన్నారు. ఇటువంటి ప్రమాదకరమైన సమయాల్లో శక్తి, ఆర్థిక వనరులను ఆయుధాలుగా ఉపయోగిస్తున్నారు.. కానీ ఈ సవాళ్లను ఎదుర్కోవడానికి బడ్జెట్‌లో ఖచ్చితమైన బ్లూప్రింట్ లేదన్నారు.

రాహుల్ గాంధీ తన ప్రసంగంలో భారత్‌ యొక్క మూడు ప్రధాన బలాలను హైలైట్ చేశారు. డేటా, రైతులు, శక్తి. మన రైతులు ఆహారాన్ని అందించడం ద్వారా దేశాన్ని స్వావలంబన చేస్తారని, శక్తి లేకుండా ఆధునిక అభివృద్ధి అసాధ్యం అని ఆయన అన్నారు. భౌగోళిక రాజకీయ పరిస్థితి మరింత దిగజారుతున్న ప్రమాదాలను బడ్జెట్ గుర్తించిందని, కానీ పరిష్కారాన్ని అందించడంలో పూర్తిగా విఫలమైందని రాహుల్ అన్నారు. ఈ బడ్జెట్‌ను సాధారణ బడ్జెట్‌గా అభివర్ణించిన ఆయన.. భవిష్యత్తులో యుద్ధాలు, AI వంటి సాంకేతికత నుండి ఉత్పన్నమయ్యే ముప్పుల నుండి రక్షణ కోసం ఇందులో ఎటువంటి ప్రత్యేక నిబంధనలు చేయలేదని అన్నారు.