భారత్‌ జోడో యాత్ర పరిధిలోకి రాని.. రాష్ట్రాల్లో కాంగ్రెస్ రాష్ట్ర స్థాయి యాత్రలు

కాంగ్రెస్ సీనియర్ నేత రాహుల్ గాంధీ నేతృత్వంలో భారత్‌ జోడో యాత్ర కొనసాగుతోంది. అయితే ఈ యాత్ర పరిధిలోకి రాని రాష్ట్రాల్లో ఆయా రాష్ట్ర స్థాయి భారత్ జోడో యాత్రలు నిర్వహిస్తున్నట్లు ఆ పార్టీ ప్రధాన కార్యదర్శి జైరాం రమేష్ మంగళవారం తెలిపారు. మంగళవారం హైదరాబాద్‌లో అడుగుపెట్టిన రాహుల్ గాంధీ యాత్రలో రమేష్ ఈ విషయాన్ని ప్రకటించారు. 55వ రోజు భారత్ జోడో యాత్ర హైదరాబాద్ మీదుగా సాగుతోంది. కన్యాకుమారి టు కాశ్మీర్ యాత్రలో భాగంగా తెలంగాణలో యాత్ర జరుగుతోంది. ఇది 12 రాష్ట్రాల గుండా వెళుతుంది.

ప్రధాన యాత్ర సాగని రాష్ట్రాల్లో పార్టీ రాష్ట్ర స్థాయి యాత్రలను ప్రారంభించిందని జైరాం రమేష్ తెలిపారు. అక్టోబర్ 31న భారత్ జోడో యాత్ర ఒడిశా భువనేశ్వర్ నుంచి బయలుదేరింది. ఇది 2,300 కిలోమీటర్లు ప్రయాణించి 24 జిల్లాల గుండా తిరిగి భువనేశ్వర్‌కు చేరుకుంటుంది. అస్సాంలో యాత్ర మంగళవారం ప్రారంభమైంది. 70 రోజుల్లో 850 కి.మీ పాదయాత్ర జరగనుంది. డిసెంబర్ 28 కాంగ్రెస్ ఆవిర్భావ దినోత్సవం సందర్భంగా.. పార్టీ పశ్చిమ బెంగాల్ యూనిట్ కోల్‌కతా నుండి సిలిగురి వరకు యాత్రను ప్రారంభించనుంది. ఇది 800 కి.మీ. వరకు జరగనుంది.

"రాబోయే కొద్ది రోజుల్లో బీహార్, జార్ఖండ్‌లలో కూడా యాత్రలు చేపట్టబడతాయి" అని జైరాం రమేష్ తెలిపారు. యాత్రలో పార్టీ రాష్ట్ర స్థాయి నేతలు పాల్గొంటారని, కాంగ్రెస్ అధ్యక్షుడు మల్లికార్జున్ ఖర్గే, దిగ్విజయ్ సింగ్, తాను, పార్టీ ఎంపీలు కూడా పాల్గొంటారని చెప్పారు. ప్రధాన యాత్ర నవంబర్ 7న మహారాష్ట్రకు చేరుకుంటుందని, అక్కడ నాందేడ్ నుంచి ప్రారంభమవుతుందని జైరాం రమేష్ తెలిపారు.

యాత్రలో ఎన్‌సిపి నేత శరద్ పవార్ పాల్గొంటారా లేదా అనే విషయంపై స్పందిస్తూ.. పవార్ అనారోగ్యంతో ప్రస్తుతం ఆసుపత్రిలో చేరారని అన్నారు. రాహుల్ గాంధీ పవార్ కుమార్తె సుప్రియా సూలేతో మాట్లాడి ఆయన ఆరోగ్యం గురించి అడిగి తెలుసుకున్నారు. ఎన్సీపీ నేతకు మూడు వారాల పాటు పడక విశ్రాంతి తీసుకోవాలని వైద్యులు సూచించారు. పవార్ ఎక్కడ కావాలంటే అక్కడ యాత్రలో చేరవచ్చని రమేష్ అన్నారు.

తెలంగాణలోని మునుగోడు అసెంబ్లీ స్థానానికి నవంబర్ 3న జరగనున్న ఉప ఎన్నికకు యాత్రకు ఎలాంటి సంబంధం లేదని మరో ప్రశ్నకు కాంగ్రెస్ నేత జైరాం రమేష్ స్పష్టం చేశారు.

"ఇది చునావ్ జీతో యాత్ర కాదు. దీనికి గుజరాత్ లేదా మధ్యప్రదేశ్ ఎన్నికలతో లేదా 2024 లోక్‌సభ ఎన్నికలతో సంబంధం లేదు. పెరుగుతున్న ఆర్థిక అసమానతలు, సామాజిక వివక్ష,రాజకీయ నియంతృత్వానికి వ్యతిరేకంగా పోరాడటానికి ఈ యాత్ర" అని ఆయన అన్నారు. ఇది కాంగ్రెస్‌ను బలోపేతం చేస్తుందని, ఎన్నికల్లో పార్టీ విజయం సాధిస్తుందని వారు ఆశిస్తున్నారు. జైరాం రమేష్ గుజరాత్ మోడల్‌ను 'నకిలీ'గా అభివర్ణించారు. "విమానాలను తయారు చేయబోయే రాష్ట్రం వంతెనను నిర్మించదు" అని ఆ రాష్ట్రంలో వంతెన కూలిపోయిన విషాదాన్ని ప్రస్తావిస్తూ ఆయన అన్నారు. ప్రధాని నరేంద్ర మోదీ సందర్శన కోసమే గుజరాత్ ప్రభుత్వం ఆస్పత్రిలో క్లీనింగ్ పనులు చేపట్టిందని కాంగ్రెస్ నేత మండిపడ్డారు.