భారత్-రష్యా స్నేహం ట్రంప్‌కు ఇష్టం లేదట‌.. అందుకే..

భారత్‌పై అమెరికా అధ్యక్షుడు డొనాల్డ్‌ ట్రంప్‌ సంచలన వ్యాఖ్యలు చేశారు. రష్యా నుంచి చమురు కొనుగోలును భారత్ ఆపకుంటే రానున్న 24 గంటల్లో భారత్ నుంచి వచ్చే వస్తువులపై భారీ సుంకాలు విధిస్తామని తెలిపారు. ట్రంప్ మాట్లాడుతూ, "భారతదేశం మంచి వాణిజ్య భాగస్వామి కాదు. వారు మన నుండి పెద్దగా కొనుగోలు చేయరు, మేము వారి నుండి చాలా కొనుగోలు చేస్తాము. ప్రస్తుతం సుంకం 25% గా నిర్ణయించబడింది, కానీ ఇప్పుడు వారు రష్యన్ చమురును కొనుగోలు చేస్తున్నారు.. కాబట్టి నేను సుంకం చాలా పెంచబోతున్నానని హెచ్చ‌రించారు.

అమెరికా మీడియాతో మాట్లాడిన ట్రంప్.. అత్యధిక టారిఫ్ ఉన్న దేశం భారత్ అని అన్నారు. ఆగస్టు 7 నుంచి భారత్‌పై అమెరికా 25 శాతం సుంకం విధించనుంది. భారత్ మాతో వ్యాపారం చేస్తుందని, కానీ మేం భార‌త్‌తో వ్యాపారం చేయబోమని అమెరికా అధ్యక్షుడు అన్నారు. భార‌త్‌ రష్యా యుద్ధ యంత్రానికి ఆజ్యం పోస్తుంది. ఏ దేశంతో పోల్చినా భారత్‌పై విధించిన‌ సుంకాలే అత్యధికమని ట్రంప్ అన్నారు. భారతదేశం రష్యా నుండి భారీ మొత్తంలో చమురును కొనుగోలు చేయడమే కాకుండా, ఆ చమురులో ఎక్కువ భాగాన్ని బహిరంగ మార్కెట్‌లో అధిక ధరలకు అమ్మడం ద్వారా భారీ లాభాలను ఆర్జిస్తోందని అన్నారు. దీనితో పాటు ఉక్రెయిన్‌లో రష్యా యుద్ధ యంత్రాల ద్వారా ఎంత మంది చనిపోతున్నా భారత్ పట్టించుకోవడం లేదని ట్రంప్ అన్నారు. ఈ కారణంగా నేను భారతదేశం నుండి అమెరికాకు చెల్లించే సుంకాలను గణనీయంగా పెంచబోతున్నానని పేర్కొన్నారు.