IMD Rain Alert : డిసెంబర్ 6 వరకు వర్షాలు

డిసెంబర్ 6 వరకు వర్షాలు కురుస్తాయని భారత వాతావరణ విభాగం (ఐఎండీ) హైదరాబాద్ అంచనా వేసింది. ఉదయం వేళల్లో పొగమంచు లేదా పొగమంచుతో కూడిన పరిస్థితులతో పాటు తేలికపాటి వర్షం లేదా చినుకులు కురుస్తాయని వాతావరణ విభాగం అంచనా వేసింది. అలాగే మరో నాలుగు రోజులు నగరంలో ఆకాశం మేఘావృతమై ఉంటుందని వాతావరణ శాఖ తెలిపింది.

ప్రస్తుతం నగరంలోని చాలా ప్రాంతాల్లో చీకటి మేఘాలు కమ్ముకున్నాయి. కొన్ని ప్రాంతాల్లో చినుకులు కురుస్తున్నాయి. నిన్న హైదరాబాద్‌లో చెదురుమదురు వర్షం కురిసింది. అత్యధికంగా షేక్‌పేట ప్రాంతంలో 9.5 మిల్లీమీటర్ల వర్షపాతం నమోదైంది.

నగరంలోని కొన్ని ప్రాంతాల్లో వర్షం పడుతుండగా.. మరికొన్ని చోట్ల మేఘావృతమైనప్పటికీ.. ఉష్ణోగ్రతలు పెరిగాయి. నిన్న నగరంలో అత్యల్ప కనిష్ట ఉష్ణోగ్రత 21.5 డిగ్రీల సెల్సియస్.. షేక్‌పేట ప్రాంతంలో నమోదైంది. శీతాకాలం వేళ వర్షాలు కురిసే అవ‌కాశం ఉంద‌ని ఐఎండీ హైదరాబాద్ అంచనా వేయడంతో రానున్న రోజుల్లో ఉష్ణోగ్రతలు బాగా తగ్గుముఖం పట్టే అవకాశం ఉంది.