Cyclone Ditwah : 100 కి.మీ వేగంతో గాలులు.. మూడు రాష్ట్రాలకు ఐఎండీ అలర్ట్..!
సెన్యార్ తుపాను కారణంగా ఇప్పటికే బంగాళాఖాతంలో అలజడి నెలకొంది.
By - Medi Samrat
సెన్యార్ తుపాను కారణంగా ఇప్పటికే బంగాళాఖాతంలో అలజడి నెలకొంది. అదే సమయంలో ఇప్పుడు దిత్వా తుఫాను ప్రభావం కూడా కనిపిస్తుంది. దిత్వా తుఫాను ఉత్తర తమిళనాడు, పుదుచ్చేరి, దక్షిణ ఆంధ్ర తీరాల వైపు వేగంగా కదులుతోంది. శ్రీలంకలో విధ్వంసం సృష్టించిన దిత్వా తుఫాను.. ఇప్పుడు భారతదేశం వైపు మళ్లింది. శ్రీలంకలో దిత్వా తుఫాను కారణంగా ఇప్పటివరకు 69 మంది మరణించారు. దీని ప్రభావం దక్షిణ భారత రాష్ట్రాల్లో కనిపిస్తుంది. దీంతో ఇక్కడ మూడు రోజుల పాటు వాతావరణం ప్రతికూలంగా ఉంటుంది.
దిత్వా తుఫాను ప్రభావంతో తమిళనాడులో గంటకు 100 కిలోమీటర్ల వేగంతో గాలులు వీచే అవకాశం ఉంది. ఈ సమయంలో భారీ వర్షాలు కురిసే అవకాశం కూడా ఉంది. తమిళనాడుతో పాటు గంటకు 60 నుంచి 100 కిలోమీటర్ల వేగంతో ఈదురు గాలులు వీస్తాయని, కేరళ, ఆంధ్రప్రదేశ్, పుదుచ్చేరి తీర ప్రాంతాల్లో భారీ వర్షాలు కురుస్తాయని ఐఎండీ పేర్కొంది.
వాతావరణ శాఖ అంచనా ప్రకారం.. దిత్వా తుఫాను శ్రీలంక తీరం, పక్కనే ఉన్న బంగాళాఖాతం గుండా ఉత్తర-వాయువ్య మార్గంలో కదులుతుంది. ఆదివారం తెల్లవారుజామున ఉత్తర తమిళనాడు, దక్షిణ ఆంధ్రప్రదేశ్ తీరాలకు చేరుకుంటుంది. దిత్వా తుఫాను ప్రమాదాన్ని అంచనా వేసిన వాతావరణ శాఖ.. దక్షిణ భారతదేశంలోని పలు ప్రాంతాల్లో భారీ వర్షాలు కురిసే అవకాశం ఉందని హెచ్చరికలు జారీ చేసింది.
తుఫాను దిత్వాహ గురించి వాతావరణ శాస్త్ర డైరెక్టర్ జనరల్ డాక్టర్ మృత్యుంజయ్ మహాపాత్ర మాట్లాడుతూ.. తుఫాను శ్రీలంక తీర ప్రాంతాలు, పక్కనే ఉన్న నైరుతి బంగాళాఖాతం మీదుగా ఉంది. ఇది చెన్నైకి దక్షిణంగా 480 కిలోమీటర్ల దూరంలో ఉంది. ఉత్తర వాయువ్య దిశగా కదులుతోంది. 29వ తేదీ ఉదయం నాటికి శ్రీలంక నుంచి బయలుదేరి నైరుతి బంగాళాఖాతంలోకి రానుంది. ఈ సమయంలో ఇది కొద్దిగా వేగవంతం కావచ్చు.
తుపాను ఉత్తర-వాయువ్య దిశగా పయనిస్తూ 30వ తేదీ ఉదయం వరకు ఉత్తర తమిళనాడు, పుదుచ్చేరి తీరానికి చేరుకుంటుంది. దీని ప్రభావంతో తమిళనాడు, దక్షిణ ఆంధ్ర ప్రదేశ్, పుదుచ్చేరిలో కొన్ని చోట్ల భారీ నుండి అతి భారీ వర్షాలు కురిసే అవకాశం ఉంది. వర్షం స్థానికంగా వరదల‌కు కారణం కావచ్చని పేర్కొంది.
29, 30 తేదీల్లో తమిళనాడు, దక్షిణ ఆంధ్రప్రదేశ్, పుదుచ్చేరి తీరాల వెంబడి సముద్రం అల్లకల్లోలంగా ఉండే అవకాశం ఉందని డాక్టర్ మృత్యుంజయ్ మహపాత్ర తెలిపారు. వీటన్నింటిని దృష్టిలో ఉంచుకుని తుపాను వల్ల ఉత్తర తమిళనాడు, పుదుచ్చేరిలోని లోతట్టు ప్రాంతాలు ముంపునకు గురయ్యే అవకాశం ఉందని, మత్స్యకారులు 30వ తేదీ వరకు సముద్రంలోకి వెళ్లవద్దని హెచ్చరించారు.
