శ్రీ‌వారి భ‌క్తుల‌కు అల‌ర్ట్‌.. ఆ రెండు రోజులు ఆల‌యం మూసివేత
Tirumala Temple To Be Closed For Pilgrims Worship On October 25 And November 8th. అక్టోబ‌రు 25న సూర్యగ్రహణం, నవంబరు 8న చంద్రగ్రహణం కార‌ణంగా ఆయా రోజుల్లో 12 గంట‌ల పాటు
By Medi Samrat Published on 11 Oct 2022 12:44 PM GMT
అక్టోబ‌రు 25న సూర్యగ్రహణం, నవంబరు 8న చంద్రగ్రహణం కార‌ణంగా ఆయా రోజుల్లో 12 గంట‌ల పాటు శ్రీ‌వారి ఆల‌య తలుపులు మూసివేయ‌నున్న‌ట్టు టీటీడీ ఓ ప్ర‌క‌ట‌న‌లో తెలిపింది. ఆ రోజుల్లో బ్రేక్ దర్శనం, శ్రీ‌వాణి, రూ.300/- ప్ర‌త్యేక ప్ర‌వేశ దర్శనం, ఇత‌ర ఆర్జిత సేవ‌ల‌ను టీటీడీ చేసింది. కేవ‌లం స‌ర్వ‌ద‌ర్శ‌నం భ‌క్తుల‌ను మాత్ర‌మే అనుమ‌తిస్తారు. అక్టోబ‌రు 25న మంగ‌ళ‌వారం సాయంత్రం 5.11 గంట‌ల నుండి 6.27 గంట‌ల వరకు సూర్యగ్రహణం ఉంటుంది. ఈ కార‌ణంగా ఉద‌యం 8.11 నుండి రాత్రి 7.30 గంట‌ల‌కు శ్రీ‌వారి ఆల‌య తలుపులు మూసి ఉంచుతారు. అనంత‌రం స‌ర్వ‌ద‌ర్శ‌నం భ‌క్తుల‌ను మాత్ర‌మే అనుమ‌తిస్తారు.
అదేవిధంగా నవంబరు 8న మంగ‌ళ‌వారం మ‌ధ్యాహ్నం 2.39 గంట‌ల నుండి సాయంత్రం 6.27 గంట‌ల వరకు చంద్రగ్రహణం ఉంటుంది. ఈ కార‌ణంగా ఉద‌యం 8.40 నుండి రాత్రి 7.20 గంట‌ల‌కు శ్రీ‌వారి ఆల‌య తలుపులు మూసి ఉంచుతారు. స‌ర్వ‌ద‌ర్శ‌నం భ‌క్తుల‌ను మాత్ర‌మే అనుమ‌తిస్తారు. సాధారణంగా గ్రహణం రోజుల్లో గ్రహణం తొల‌గిపోయే వరకు వంట చేయరు. తిరుమ‌ల‌లోని మాతృశ్రీ త‌రిగొండ వెంగ‌మాంబ అన్న‌ప్ర‌సాద భ‌వ‌నం, వైకుంఠం క్యూ కాంప్లెక్స్ ఇత‌ర ప్రాంతాల్లో కూడా అన్న‌ప్ర‌సాద విత‌ర‌ణ ఉండ‌దు. హోటళ్లు కూడా గ్రహణం పూర్తయ్యే వరకు మూసి ఉంచుతారు. దీంతో భ‌క్తులు ఈ విషయాన్ని గమనించి, అసౌకర్యానికి గురికాకుండా ఉండేందుకు వీలుగా త‌మ తిరుమల యాత్రను రూపొందించుకోవాల‌ని టీటీడీ విజ్ఞప్తి చేసింది.
