Nalgonda: కేటీఆర్ రైతు మహా ధర్నా.. పర్మిషన్‌ నిరాకరించిన పోలీసులు

నల్గొండ జిల్లాలోని క్లాక్ టవర్ సెంటర్ వద్ద బీఆర్‌ఎస్ ఆధ్వర్యంలో మంగళవారం ఉదయం 10 గంటల నుంచి సాయంత్రం 4 గంటల వరకు నిర్వహించనున్న రైతు మహా ధర్నాకు నల్గొండ పోలీసులు అనుమతి నిరాకరించారు. తెలంగాణ ప్రభుత్వం అసెంబ్లీ ఎన్నికల సందర్భంగా రైతులకు ఇచ్చిన హామీలను నెరవేర్చడంలో విఫలమైనందుకు నిరసనగా మంగళవారం క్లాక్ టవర్ సెంటర్‌లో రైతు మహా ధర్నాకు అనుమతి ఇవ్వాలని కోరుతూ బీఆర్‌ఎస్ నల్గొండ టౌన్ ప్రెసిడెంట్ బి.దేవేందర్ జనవరి 17న పోలీసులకు వినతిపత్రం సమర్పించారు.

ఈ ధర్నాలో బీఆర్‌ఎస్‌ వర్కింగ్‌ ప్రెసిడెంట్‌ కేటీ రామారావు (కేటీఆర్‌) పాల్గొంటారని దరఖాస్తులో దేవేందర్‌ తెలిపారు. అయితే, జిల్లా నుండి పెద్ద సంఖ్యలో బీఆర్‌ఎస్‌ కార్యకర్తలు హాజరయ్యే అవకాశం ఉందని, క్లాక్ టవర్ సెంటర్‌ను నలుమూలల నుండి బ్లాక్ చేస్తారని స్పష్టమైన సమాచారం వచ్చిదంటూ పేర్కొంటూ పోలీసులు ధర్నాకు అనుమతి నిరాకరించారు. దీంతో ట్రాఫిక్‌ అంతరాయం ఏర్పడి ప్రజలు ఇబ్బందులు పడుతారని, క్లాక్ టవర్ సెంటర్ ఇరుకైన రోడ్లతో వాణిజ్య సముదాయాలతో రద్దీగా ఉండే జంక్షన్ అని, జంక్షన్‌లో రోజంతా రద్దీ ఎక్కువగా ఉంటుందని పోలీసులు వివరించారు. పైగా జంక్షన్ నుంచి ట్రాఫిక్‌ను మళ్లించేందుకు ప్రత్యామ్నాయ మార్గం లేదని తెలిపారు. అదే సమయంలో, క్లాక్ టవర్ సెంటర్ వద్ద తగినంత పార్కింగ్ స్థలం లేదు. ప్రస్తుతం ఎన్‌హెచ్‌-65 (హైదరాబాద్‌-విజయవాడ), నార్కెట్‌పల్లి-ఆదంకి రాష్ట్ర రహదారిపై వాహనాల రద్దీ ఎక్కువగా ఉంది. మరో మూడు రోజుల పాటు ఇదే పరిస్థితి కొనసాగనుంది. ఈ నేపథ్యంలో ధర్నాకు పోలీసులు అనుమతి నిరాకరించారు.