ఆయన మిస్‌ గైడెడ్ మిస్సైల్‌లా పనిచేస్తున్నారు..సీఎం రేవంత్‌పై ఎమ్మెల్సీ కవిత ఫైర్

నీళ్ల విషయంలో సీఎం రేవంత్ రెడ్డి నీచ రాజకీయం చేస్తున్నారని బీఆర్ఎస్ ఎమ్మెల్సీ కవిత కీలక వ్యాఖ్యలు చేశారు. తెలంగాణ జాగృతి ఆధ్వర్యంలో 'నీళ్లు-నిజాలు'పై హైదరాబాద్‌లోని సోమాజీగూడ ప్రెస్‌క్లబ్‌లో రౌండ్ టేబుల్ సమావేశం నిర్వహించారు. ఈ సందర్భంగా ఎమ్మెల్సీ కవిత మాట్లాడుతూ.. నీటి విషయాల్లో రాజకీయం మానేసి నిజాలు చెప్పాలని అన్నారు. కాంగ్రెస్ పార్టీ బురద రాజకీయానికి గోదావరి వరదను కూడా తట్టుకుని మేడిగడ్డ బ్యారేజీ మేరునగ ధీరుడిలా నిలబడిందని అన్నారు. కేసీఆర్ పూర్తి చేసిన ప్రధాన ప్రాజెక్టుల్లో మిగిలి ఉన్న చిన్న చిన్న పనులను కాంగ్రెస్ ప్రభుత్వం పూర్తి చేయాలని ఆమె డిమాండ్ చేశారు. రాజకీయాలకు అతీతంగా కాంగ్రెస్ ప్రభుత్వం రాష్ట్ర ప్రయోజనాలను కాపాడి, రాజనీతతజ్ఞతను ప్రదర్శించాలని ఎమ్మెల్సీ కవిత సూచించారు.

సీఎం రేవంత్ రెడ్డి మిస్ గైడెడ్ మిస్సైల్‌లా పని చేస్తున్నారని ఎమ్మెల్సీ కవిత విమర్శించారు. కేసీఆర్ తన శత్రువు అని సీఎం రేవంత్ రెడ్డి అనుకుంటున్నాడని..కానీ మన జలాలను తరలిస్తోన్న ఆంధ్రా పాలకులు మన శత్రువులని సీఎం గమనించాలని కవిత అన్నారు. కృష్ణ ట్రైబ్యునల్‌లో రాష్ట్రం తరపున వాదనలు బలంగా వినిపించాలని డిమాండ్ చేశారు. తెలంగాణ సమగ్రాభివృద్ధిలో నీటి వనరులు ఒక ప్రధాన అంశంగా పెట్టుకుని బీఆర్ఎస్ ప్రభుత్వ ముందుకెళ్లిందని, కానీ కాంగ్రెస్ ప్రభుత్వం జలవనరుల రంగాన్ని విస్మరిస్తుందని ఆరోపించారు. గతంలో కాంగ్రెస్ నాయకులు పదవుల కోసం పైరవీలు చేసుకున్నారు కానీ.. ప్రాజెక్టుల కోసం కొట్లాడలేదని విమర్శలు చేశారు. గట్టిగా జై తెలంగాణ అంటే.. వెంటనే ఫేక్ ప్రాజెక్టును శంకుస్థాపనలు చేసేవారు అని ఎమ్మెల్సీ కవిత అన్నారు.