26 నుంచి బీజేపీ బస్సు యాత్ర..!

అసెంబ్లీ ఎన్నికలపై కమలం పార్టీ ఫోకస్ పెట్టింది. ఈ క్ర‌మంలోనే ఈనెల‌ 26 నుంచి వచ్చే నెల 14 వరకు బీజేపీ బస్సుయాత్ర చేయ‌నున్న‌ట్లు తెలుస్తుంది. ఈ బస్సుయాత్ర కోసం బీజేపీ మూడు రూట్లను సిద్దం చేసింది. ఈ యాత్ర ముగింపు స‌భ‌కు తెలంగాణకు ప్రధానమంత్రి నరేంద్ర మోదీ కూడా రానున్నారు. బాసర, సోమశిల, భద్రాచలం నుంచి బస్సుయాత్రను ప్రారంభించనున్నట్లు స‌మాచారం. తెలంగాణను మూడు జోన్లుగా విభజించిన కమలం పార్టీ.. ఆదిలాబాద్, నిజామాబాద్, మెదక్ ఉమ్మడి జిల్లాలు బాసర ఒక జోన్ కాగా.. మహబూబ్‌నగర్, నల్గొండ, రంగారెడ్డి జిల్లాలు సోమశిల జోన్‌గా.. ఖమ్మం, వరంగల్, కరీంనగర్.. భద్రాచలం జోన్ గా విభజించినట్లు తెలుస్తుంది. ఈ మూడు బస్సు యాత్రలు హైదరాబాద్ లో ముగియనున్నాయి. హైదరాబాద్ లో ముగింపు సభకు ప్రధానమంత్రి మోదీ హాజరుకానున్నారు. 19 రోజులు.. నాలుగు వేల కిలోమీటర్ల మేర బీజేపీ బస్సుయాత్ర సాగనుంది.