యశస్వి జైస్వాల్‌ను బాగా ఇబ్బంది పెడుతున్న దక్షిణాఫ్రికా బౌలర్లు

గౌహతి వేదికగా జరుగుతున్న రెండో టెస్టు మ్యాచ్ రెండో ఇన్నింగ్స్‌లో భారత క్రికెట్ జట్టు ఓపెనింగ్ బ్యాట్స్‌మెన్ యశస్వి జైస్వాల్ విఫలమయ్యాడు. తొలి ఇన్నింగ్స్‌లో హాఫ్‌ సెంచరీ సాధించాడు యశస్వి. యశస్వి భారీ ఇన్నింగ్స్ ఆడి జట్టును ఆదుకునే అవకాశం వచ్చింది. అయితే మళ్లీ పాత సమస్య అతడిని చుట్టుముట్టింది. రెండో ఇన్నింగ్స్‌లో యశస్వి 20 బంతులు ఆడి 13 పరుగులు చేశాడు. తన ఇన్నింగ్స్‌లో ఒక ఫోర్, ఒక సిక్స్ కొట్టాడు. అతను మార్కో జాన్సెన్ వేసిన బంతికి కైల్ వారెన్‌కి క్యాచ్ ఇచ్చాడు. యాన్సెన్ తనను అవుట్ చేయ‌డం ఇదే మొదటిసారి కాదు. ఇది ఇంతకు ముందు కూడా జరిగింది.

టెస్టుల్లో మొదటి నుంచి యశస్వికి యాన్సెన్ సమస్య ప‌ట్టుకుంది. యశస్వి ఇప్పటివరకు యాన్సెన్ వేసిన‌ 73 బంతులు ఆడాడు. అందులో యశస్వి 42 పరుగులు చేశాడు. మూడుసార్లు అతనికే వికెట్ స‌మ‌ర్పించుకున్నాడు. ఈ బౌలర్‌పై అతని సగటు 14. స్ట్రైక్ రేట్ 57.53. యాన్సెన్ మాత్రమే కాదు, దక్షిణాఫ్రికా ఎడమచేతి వాటం బౌలర్లపై యశస్వి ఇబ్బందులను ఎదుర్కొంటున్నాడు. దక్షిణాఫ్రికా బౌలర్లు 109 బంతుల్లో ఆరుసార్లు యశస్విని అవుట్ చేశారు. ఇందులో యశస్వి సగటు 10.5 కాగా.. స్ట్రైక్ రేట్ 57.79.

కోల్‌కతాలో ఉత్కంఠభరితంగా సాగిన మ్యాచ్‌లో 30 పరుగుల తేడాతో ఓడిన టీమ్‌ఇండియా సిరీస్‌ను కాపాడుకోవడానికి రెండో టెస్టు చాలా కీలకం. ఈ మ్యాచ్‌లో గెలవకపోతే సిరీస్‌ను కోల్పోతారు. గత ఏడాదిగా స్వదేశంలో ఇది వరుసగా రెండవ టెస్ట్ సిరీస్ ఓటమి అవుతుంది. గతేడాది నవంబర్‌లో న్యూజిలాండ్ 3-0తో భారత్‌ను ఓడించింది.

గౌహతి టెస్టులో భారత్ 549 పరుగుల భారీ లక్ష్యాన్ని అందుకుంది. అయితే.. టీమ్ ఇండియా శుభారంభం చేయలేకపోయింది. యశస్వి తొందరగానే ఔటయ్యాడు. అతని ఓపెనింగ్ భాగస్వామి KL రాహుల్ కూడా ఆరు పరుగులు చేసి సైమన్ హార్మర్ బౌలింగ్‌లో అవుట‌య్యాడు.