T20 World Cup : ఆస్ట్రేలియాపై ఆ జ‌ట్టు గెల‌వాల‌ని కోరుకుంటున్న‌ టీమిండియా..!

ప్రస్తుతం జరుగుతున్న టీ20 ప్రపంచకప్‌లో సెమీఫైనల్‌కు చేరుకోవడం భారత మహిళా క్రికెట్ జట్టుకు చాలా కష్టంగా మారింది. హర్మన్‌ప్రీత్ కౌర్ నేతృత్వంలోని భారత్ తన తొలి మ్యాచ్‌లో న్యూజిలాండ్ చేతిలో ఓటమిని చవిచూడాల్సి వచ్చింది. దీని తర్వాత పునరాగమనం చేసిన టీమ్ ఇండియా తన తదుపరి మ్యాచ్‌లో చిరకాల ప్రత్యర్థి పాకిస్థాన్‌ను 6 వికెట్ల తేడాతో ఓడించింది. త‌ద్వారా భారత జట్టు మహిళల T20 ప్రపంచ కప్ 2024లో సెమీ-ఫైనల్ ఆశ‌ల‌ను సజీవంగా ఉంచుకుంది. అయితే టాప్‌-4కి చేరుకోవడానికి మాత్రం సమీకరణాలు చాలా క్లిష్టంగా ఉన్నాయి.

భారత జట్టు సెమీ-ఫైనల్‌కు చేరుకోవాలంటే.. తదుపరి రెండు మ్యాచ్‌లను భారీ తేడాతో గెలవాలి. దీంతో పాటు.. ఇతర మ్యాచ్‌ల ఫలితాలపై కూడా ఆధారపడాల్సిన ప‌రిస్థితి వ‌చ్చింది. ఈ ఎపిసోడ్‌లో న్యూజిలాండ్‌-ఆస్ట్రేలియా జట్ల మధ్య జరిగే మ్యాచ్‌ భారత్‌ పరంగా కీలకం కానుంది. ఈ మ్యాచ్‌లో భారత్.. న్యూజిలాండ్ గెల‌వాల‌ని కోరుకుంటుంది. ఎందుకంటే కివీ జట్టు ఆస్ట్రేలియాను ఓడించినట్లయితే.. టాప్‌-4కి చేరుకోవాలనే భారత్‌ ఆశలు కాస్త‌ బలపడతాయి.

భారత జట్టు తన చివరి మ్యాచ్‌లో పాకిస్థాన్‌ను 6 వికెట్ల తేడాతో ఓడించింది. కానీ టీమ్ ఇండియా నెట్ రన్ రేట్ మాత్రం ప్రతికూలంగా ఉంది. ఎందుకంటే తొలి మ్యాచ్‌లో కివీస్‌పై 58 పరుగుల తేడాతో ఓటమి పాలైంది. భారత్ రన్ రేట్ -1.217. ఆస్ట్రేలియా రన్ రేట్ +1.098, న్యూజిలాండ్ రన్ రేట్ +2.9గా ఉండ‌ట‌మే ఇందుకు కార‌ణం. ఆస్ట్రేలియా ఓడిన‌ట్లైతే ర‌న్‌రేట్ ప‌డిపోతుంది. అది కేవ‌లం రెండు మ్యాచ్‌లు మాత్ర‌మే ఆడాల్సివున్న‌ భార‌త్‌కు క‌లిసిరానుంది.

2006 నుండి న్యూజిలాండ్, ఆస్ట్రేలియా జ‌ట్ల‌ మధ్య 51 T20 అంతర్జాతీయ మ్యాచ్‌లు జరిగాయి. కివీ మహిళలు 21 మ్యాచ్‌లు గెలుపొందగా.. కంగారూ మహిళలు 28 సార్లు గెలిచారు. ఒక మ్యాచ్ డ్రా కాగా, ఒక మ్యాచ్ అసంపూర్తిగా నిలిచింది. మహిళల టీ20 ప్రపంచ కప్ చరిత్ర ప‌రిశీలిస్తే.. ఆస్ట్రేలియాపై న్యూజిలాండ్ రికార్డు 3-4గా ఉంది. ఇరు జట్ల మధ్య జరిగిన చివరి 10 మహిళల టీ20 మ్యాచ్‌లను పరిశీలిస్తే.. ఆస్ట్రేలియా 8-2తో ఆధిక్యంలో ఉంది.