సన్‌రైజర్స్ హైదరాబాద్‌ను ప్లేఆఫ్స్‌లోకి నెట్టిన వ‌ర్షం..!

ఐపీఎల్ 2024లో భాగంగా 66వ మ్యాచ్‌ గుజరాత్ టైటాన్స్‌, సన్‌రైజర్స్ హైదరాబాద్ జ‌ట్ల మ‌ధ్య‌ జ‌ర‌గాల్సివుంది. హైదరాబాద్‌లోని రాజీవ్ గాంధీ అంతర్జాతీయ స్టేడియంలో ఈ మ్యాచ్ జరగాల్సి ఉండ‌గా.. వర్షం కారణంగా మ్యాచ్ జరగలేదు. దీంతో హైదరాబాద్ జట్టు ప్లేఆఫ్‌కు చేరుకుంది. 7:30 ప్రాంతంలో కాసేపు వర్షం ఆగడంతో అరగంట ఆలస్యమైనా మ్యాచ్ ప్రారంభం అయ్యేలా కనిపించింది. టాస్‌కు సమయం 8 గంటలకు నిర్ణయించి 8.15కి మ్యాచ్ ప్రారంభం అయ్యేలా ప్లాన్ చేశారు. కానీ 8 గంటలకు ఐదు నిమిషాల ముందు మళ్లీ భారీ వర్షం మొద‌లై మ‌ళ్లీ ఆగ‌లేదు. ఐదు ఓవర్ల మ్యాచ్‌కు 10.30 కటాఫ్ సమయం ఉంది. అయితే, అవుట్‌ఫీల్డ్ చాలా తడిగా ఉంది. గ్రౌండ్‌లోని చాలా ప్రాంతాల్లో నీరు పేరుకుపోయింది. ఈ నేపథ్యంలో అంపైర్లు గ్రౌండ్‌ సిబ్బందితో మాట్లాడి మ్యాచ్‌ను రద్దు చేయాలని నిర్ణయించారు.

ఈ సీజన్‌లో వర్షం అంతరాయం కలిగించిన మూడో మ్యాచ్‌ ఇది. అంతకుముందు కోల్‌కతా-ముంబై మధ్య జరిగిన మ్యాచ్‌కు కూడా వర్షం కార‌ణంగా దెబ్బతింది. ఆ మ్యాచ్ రెండు గంటల 15 నిమిషాల ఆలస్యంగా ప్రారంభమై 16-16 ఓవర్ల వరకు సాగింది. ఆ త‌ర్వాత కోల్‌కతాతో గుజరాత్ ఆడాల్సిన మ్యాచ్ వర్షం కారణంగా రద్దయింది. హైదరాబాద్-గుజరాత్ మ్యాచ్ వర్షం కారణంగా రద్దయిన రెండో మ్యాచ్.

వర్షం కారణంగా సన్‌రైజర్స్ హైదరాబాద్ జట్టు ప్లేఆఫ్‌కు చేరుకుంది. ఈ మ్యాచ్ రద్దు కావడంతో హైదరాబాద్, గుజరాత్ జట్లకు ఒక్కో పాయింట్ లభించింది. ప్రస్తుతం 13 మ్యాచ్‌లు ఆడిన హైదరాబాద్‌ 15 పాయింట్లతో పాయింట్ల పట్టికలో మూడో స్థానానికి చేరుకుంది. చెన్నై సూపర్ కింగ్స్ మినహా మరే ఇతర జట్టు 15 లేదా అంతకంటే ఎక్కువ పాయింట్లు సాధించలేదు. దీంతో సన్‌రైజర్స్ ప్లేఆఫ్‌కు అర్హత సాధించింది. 13 మ్యాచ్‌లు ముగిసేసరికి చెన్నైకి 14 పాయింట్లు ఉన్నాయి. మే 18న చెన్నై బెంగళూరుతో తలపడనుంది. బెంగళూరుకు 12 పాయింట్లు ఉన్నాయి. ఢిల్లీ జట్టు ప్లే ఆఫ్ రేసు నుండి నిష్క్రమించింది. లక్నో నెగెటివ్ నెట్ రన్ రేట్‌ను కలిగి ఉంది. దానిని కవర్ చేయడం కష్టం. దీంతో చెన్నై, బెంగళూరు మధ్య మ్యాచ్ వర్చువల్ నాకౌట్ అవుతుంది. గెలిచిన జ‌ట్టు ప్లేఆఫ్‌కు చేరుకుంటుంది.