రోహిత్ భారీ సిక్స‌ర్‌.. బంతి త‌గిలి నొప్పితో విల‌విల‌లాడిన చిన్నారి.. వీడియో

ఇంగ్లాండ్‌తో జ‌రుగుతున్న మూడు వ‌న్డేల సిరీస్‌లో భార‌త్ శుభారంభం చేసింది. తొలి వ‌న్డేలో 10 వికెట్ల తేడాతో టీమ్ఇండియా ఘ‌న విజ‌యం సాధించింది. కెప్టెన్‌, హిట్‌మ్యాన్ రోహిత్ శ‌ర్మ త‌న‌దైన శైలిలో సిక్స‌ర్ల‌తో అభిమానుల‌ను అల‌రించాడు. అయితే.. రోహిత్ కొట్టిన ఓ సిక్స‌ర్ బంతి త‌గిలి ఓ చిన్నారి నొప్పితో విల‌విల‌లాడింది. ఇందుకు సంబంధించిన వీడియో ప్ర‌స్తుతం సోష‌ల్ మీడియాలో వైర‌ల్‌గా మారింది.

భార‌త ఇన్నింగ్స్ ఐదో ఓవ‌ర్‌లో డేవిడ్ విల్లే వేసిన బంతిని పుల్ షాట్‌తో రోహిత్ శ‌ర్మ భారీ సిక్సర్‌గా మ‌లిచాడు. అయితే.. ఆ బంతి మ్యాచ్ చూడ‌డానికి త‌న తండ్రితో వ‌చ్చిన ఓ చిన్నారికి డైరెక్టుగా త‌గిలింది. దీంతో ఆ చిన్నారి నొప్పితో విల‌విల‌లాడింది. ఈ విష‌యాన్ని బౌండ‌రీ ద‌గ్గ‌ర ఫీల్డింగ్ చేస్తున్న బెన్‌స్టోక్స్ త‌న స‌హ‌చ‌రుల‌కు చెప్ప‌గా వారు రోహిత్‌కు జరిగిన‌ది చెప్పారు.

దీంతో రోహిత్ తో పాట కామేంటేట‌ర్లు చిన్నారి గురించి ఆరా తీసే క్ర‌మంలో ఆందోళ‌న వ్య‌క్తం చేశారు. ఈ క్ర‌మంలో మ్యాచ్‌కు కాసేపు అంత‌రాయం క‌లిగింది. ఇంగ్లాండ్ ఫిజియోలు ఆ చిన్నారికి ప్ర‌థ‌మ చికిత్స అందించ‌డంతో కోలుకుంది. దీంతో అంద‌రూ ఊపిరిపీల్చుకున్నారు. ఈఘ‌ట‌న‌కు సంబంధించిన వీడియోను ఓ అభిమాని సోష‌ల్ మీడియాలో పోస్ట్ చేయ‌గా అది వైర‌ల్‌గా మారింది.

ఇక మ్యాచ్ విష‌యానికి వ‌స్తే తొలుత బ్యాటింగ్ చేసిన ఇంగ్లాండ్ 25.2 ఓవ‌ర్ల‌లో 110 ప‌రుగుల‌కే కుప్ప‌కూలింది. జస్‌ప్రీత్‌ బుమ్రా (6/19) సంచ‌ల‌న బౌలింగ్‌కు మహ్మద్‌ షమీ (3/31) మెరుపులు కూడా తోడు అయ్యాయి. కెప్టెన్‌ జోస్‌ బట్లర్‌ (30; 32 బంతుల్లో 6×4) టాప్‌స్కోరర్‌ గా నిలిచాడు. ఇంగ్లాండ్ నిర్దేశించిన 111 ప‌రుగుల ల‌క్ష్యాన్ని భార‌త్ 18.4 ఓవర్లలో ఒక్క వికెట్ కూడా కోల్పోకుండా చేదించింది. కెప్టెన్ రోహిత్‌ శర్మ (76 నాటౌట్‌; 58 బంతుల్లో 7పోర్లు, 5సిక్స‌ర్లు)తో పాటు మరో ఓపెనర్‌ ధావన్‌ (31 నాటౌట్‌; 54 బంతుల్లో 4పోర్లు) రాణించారు.