త్యాగానికి సిద్ధమైన రోహిత్ శర్మ

రోహిత్ శర్మ లేకుండానే భారతజట్టు ఆస్ట్రేలియా మీద బోర్డర్ గవాస్కర్ ట్రోఫీ మొదటి టెస్ట్ మ్యాచ్ లో విజయం సాధించింది. ఇప్పుడు రెండో టెస్ట్ మ్యాచ్ కు రోహిత్ శర్మ అందుబాటులోకి రాగా ఓపెనర్లు ఎవరనే విషయంలో సస్పెన్స్ కొనసాగుతూ ఉంది. అయితే ఈ విషయంలో రోహిత్ శర్మ త్యాగానికి సిద్ధమయ్యాడు. అడిలైడ్‌లో భారత్-ఆస్ట్రేలియా మధ్య జరగబోయే రెండో టెస్టు సందర్భంగా కెప్టెన్ రోహిత్ శర్మ మీడియాతో మాట్లాడాడు. తన ఓపెనింగ్ స్థానాన్ని వదులుకుంటానని ధృవీకరించాడు. డిసెంబర్ 6న ప్రారంభమయ్యే కీలకమైన పింక్-బాల్ టెస్ట్‌కు ముందు తన ఓపెనర్ స్థానానికి త్యాగం చేస్తున్నట్లు రోహిత్ ధృవీకరించారు.

KL రాహుల్, యశస్వి జైస్వాల్‌లు ఓపెనింగ్ బ్యాటింగ్‌లో కొనసాగించడానికి అనుమతించడం వ్యక్తిగతంగా తనకు అంత సులభం కాదని రోహిత్ శర్మ ధృవీకరించాడు. కానీ జట్టు అవసరాలకు ప్రాధాన్యతనిచ్చేటప్పుడు ఇది ఖచ్చితంగా అవసరమని రోహిత్ చెప్పడం విశేషం. రెండో బిడ్డకు ఇటీవలే స్వాగతం పలికిన రోహిత్ బోర్డర్-గవాస్కర్ ట్రోఫీ తొలి టెస్టుకు దూరమయ్యాడు. అతని గైర్హాజరీలో, KL రాహుల్, యశస్వి జైస్వాల్ ఓపెనింగ్ కు వచ్చారు. రెండో ఇన్నింగ్స్‌లో భారత్‌కు 201 పరుగుల భాగస్వామ్యాన్ని అందించారు. దీంతో రోహిత్ శర్మ పింక్ బాల్ టెస్ట్ లో మిడిల్ ఆర్డర్ లో రాబోతున్నాడు.