భారత్‌లో అడుగుపెట్టనున్న పాకిస్థాన్ టీమ్స్

పాకిస్తాన్ పురుషుల హాకీ జట్లు వచ్చే నెలలో జరిగే ఆసియా కప్, ఈ సంవత్సరం చివర్లో జరిగే జూనియర్ ప్రపంచ కప్ కోసం భారతదేశానికి రానున్నాయి. వారికి ఎలాంటి అడ్డంకులు లేవని క్రీడా మంత్రిత్వ శాఖ వర్గాలు గురువారం ధృవీకరించాయి. అడ్డుకోడానికి చేసే ఏ ప్రయత్నం అయినా ఒలింపిక్ చార్టర్‌ను ఉల్లంఘించడమే అవుతుందని ప్రభుత్వం తెలిపింది.

భారతదేశం, పాకిస్తాన్ మధ్య ద్వైపాక్షిక క్రీడా సంబంధాలు నిలిపివేసినప్పటికీ, భారతదేశంలో జరిగే పలు ఈవెంట్లలో పాకిస్తాన్ పాల్గొనడానికి ఇది అడ్డుకాదని ప్రభుత్వం స్పష్టం చేసింది. ఆసియా కప్ ఆగస్టు 27 నుండి సెప్టెంబర్ 7 వరకు బీహార్‌లోని రాజ్‌గిర్‌లో జరగనుంది, జూనియర్ ప్రపంచ కప్ నవంబర్ 28 నుండి డిసెంబర్ 10 వరకు చెన్నై, మధురైలలో జరగనుంది.

దాదాపు రెండు దశాబ్దాలుగా భారతదేశం, పాకిస్తాన్ ఏ క్రీడలోనూ ద్వైపాక్షిక సిరీస్‌లు ఆడలేదు. ఏప్రిల్‌లో పహల్గామ్ ఉగ్రవాద దాడిలో 26 మంది భారతీయ పర్యాటకులు ప్రాణాలు కోల్పోయిన తరువాత, ఉద్రిక్తతలు మరింత పెరిగాయి. సరిహద్దు వెంబడి ఉగ్రవాద మౌలిక సదుపాయాలను లక్ష్యంగా చేసుకుని భారతదేశం ప్రతీకారంగా ఆపరేషన్ సిందూర్ చేపట్టింది.