ఆశ్చ‌ర్యం.. భారత జట్టులో అత్యంత కష్టపడే ఆటగాడు కోహ్లీ కాద‌ట‌.?

జాతీయ జట్టులో శుభ్‌మన్ గిల్ కష్టపడి పనిచేసే ఆటగాడని భారత జట్టు దూకుడు ఓపెనర్ యశస్వి జైస్వాల్ అన్నాడు. ఈ విష‌యంలో యశస్వి జైస్వాల్ విరాట్ కోహ్లీ పేరు చెప్ప‌కుండా అభిమానులను ఆశ్చర్యపరిచాడు. కోహ్లి క్రమశిక్షణ, త‌న‌ అభ్యాసంతో కష్టపడి పనిచేయడంలో కొత్త బెంచ్‌మార్క్‌ని సెట్ చేశాడు. ఈ క్ర‌మంలోనే అత‌డు ఆధునిక క్రికెటర్లలో గొప్ప క్రికెట‌ర్‌గా పరిగణించబడ్డాడు. 37 ఏళ్ల వయసులో కూడా కోహ్లీకి పరుగుల ఆకలి తగ్గలేదు. అతడు ఇప్పటికీ యువకుడిలా కష్టపడి శిక్షణ తీసుకుంటాడు.

అయితే.. శుభ్‌మన్ గిల్‌ని ఎంచుకోవడానికి యశస్వి జైస్వాల్‌కు తనదైన కారణాలు ఉన్నాయి. ఆజ్ తక్‌తో జరిగిన సంభాషణలో జైస్వాల్ మాట్లాడుతూ, 'శుబ్‌మన్ గిల్ కష్టపడి పనిచేసే ఆటగాడు. ఈమధ్య అత‌డిని చాలా దగ్గరగా చూశాను. అతడు చాలా క‌ష్ట‌ప‌డ‌తాడు. తన దినచర్య విషయంలో కఠినంగా ఉంటాడు. అతడు తన ఫిట్‌నెస్, డైట్, నైపుణ్యాలు, శిక్షణపై చాలా కృషి చేస్తాడు. ఇది నమ్మశక్యం కాదు. గిల్ ఆడటం లేదా అతనితో ఆడడం చాలా సరదాగా ఉంటుంది. అతడు అద్భుతమైన వ్యక్తి. ఇంగ్లండ్ టెస్టు సిరీస్‌లో అతడు బాగా, తెలివిగా బ్యాటింగ్ చేశాడు. అతడు ఏ పరిస్థితిలోనైనా మెరుగ్గా రాణించగలడనే నమ్మకం మాకు ఉందని కొనియాడాడు.

గత వారం దక్షిణాఫ్రికాపై యశస్వి తన వన్డే కెరీర్‌లో మొదటి సెంచరీని సాధించాడు. జైస్వాల్ అజేయంగా 116 పరుగులు చేశాడు. దీని సహాయంతో భారత్ 39.5 ఓవర్లలో 271 పరుగుల లక్ష్యాన్ని సులభంగా సాధించింది. దక్షిణాఫ్రికాతో జరిగిన వన్డే సిరీస్‌ను భారత జట్టు 2-1తో కైవసం చేసుకుంది.