ఆ రోజు ధోనీ కోపంగా ఎందుకు వెళ్లాడో చెప్పిన హర్భజన్..!

భారత జట్టు మాజీ కెప్టెన్ మహేంద్ర సింగ్ ధోనీ ఎంత‌ ప్రశాంతంగా ఉంటాడో అంద‌రికీ తెలిసిందే. అందుకే అతడికి 'కెప్టెన్ కూల్' అనే బిరుదు కూడా వచ్చింది. మైదానంలో అతడు మైండ్ గేమ్ ద్వారా నిర్ణయాలు తీసుకోవడం, కష్ట సమయాల్లో కూడా ప్రశాంతంగా ఉండ‌టం అందరి హృదయాలను గెలుచుకుంది. అయితే ధోని తన ప్ర‌శాంత‌త‌ను కోల్పోయిన సందర్భాలు కొన్ని ఉన్నాయి. IPL 2024 మ్యాచ్‌లో ఇది జరిగింది. ఇది చూసి అందరూ ఆశ్చర్యపోయారు. భారత మాజీ క్రికెటర్ హర్భజన్ సింగ్ ధోనీకి సంబంధించిన సంఘటనను వివరించాడు.

హర్భజన్ సింగ్ స్పోర్ట్స్ యారీతో మాట్లాడుతూ.. IPL 2024 సందర్భంగా RCBతో జరిగిన మ్యాచ్‌లో ఓడిపోయిన తర్వాత MS ధోని చాలా కోపంగా ఉన్నాడని వెల్లడించాడు. 18 మే 2024న RCB మరియు CSK జట్లు లీగ్ దశలో తమ చివరి మ్యాచ్‌లు ఆడుతున్నాయి. ప్లేఆఫ్స్‌కు వెళ్లడానికి CSK ఆ మ్యాచ్‌లో గెలవడం చాలా ముఖ్యం, కానీ చెన్నై ఆ మ్యాచ్‌లో 27 పరుగుల భారీ తేడాతో ఓడిపోయింది.

సాధారణంగా మ్యాచ్ ముగిసిన తర్వాత ఇరు జట్ల ఆటగాళ్లు కరచాలనం చేసుకుంటారు. కానీ ఆ మ్యాచ్ తర్వాత ధోనీ షేక్ హ్యాండ్ ఇవ్వకుండానే డ్రెస్సింగ్ రూమ్‌కి వచ్చాడు. RCB జట్టు విజయాన్ని సంబరాలు చేసుకుంటోంది. నేను మొత్తం సన్నివేశాన్ని చూస్తున్నాను.. కానీ ఆటగాళ్లను కలవకుండా MS ధోని డ్రెస్సింగ్ రూమ్ వైపుకు వెళ్లాడు. అంతేకాదు.. త‌న‌ను చూపిస్తున్న‌ స్క్రీన్‌పై బాటిల్‌తో పంచ్ విసిరే ప్ర‌య‌త్నం చేశాడ‌ని తెలిపాడు

ఈ మ్యాచ్‌లో తొలుత బ్యాటింగ్ చేసిన ఆర్సీబీ జట్టు 218 పరుగులు చేసింది. చెన్నై ఓడిపోయినా బెంగళూరు 18 పరుగుల కంటే ఎక్కువ తేడాతో గెలవకుండా చూసుకోవాల్సిన విధంగా ప్లేఆఫ్ సమీకరణాలు మారాయి. ఈ మ్యాచ్‌లో విజయం సాధించేందుకు CSKకి 35 పరుగులు అవసరం కాగా.. ప్లేఆఫ్‌కు అర్హత సాధించేందుకు 16 పరుగులు మాత్రమే చేయాల్సి ఉంది. చివరి ఓవర్లో చెన్నై 7 పరుగులు మాత్రమే చేయగలిగింది. ప్లేఆఫ్‌కు వెళ్లలేకపోవడంతో ధోనీ తీవ్ర ఆగ్రహం వ్యక్తం చేశాడని హర్భజన్ పేర్కొన్నాడు.