శ్రీలంకతో సిరీస్ ఓడినా అగ్ర‌స్థానంలోనే టీమిండియా.. కోహ్లీని వెన‌క్కి నెట్టిన రోహిత్

ఇటీవల భారత్-శ్రీలంక మధ్య మూడు వన్డేల సిరీస్ పూర్తయింది. భారత జట్టు 27 ఏళ్ల తర్వాత శ్రీలంకతో ద్వైపాక్షిక వన్డే సిరీస్‌ను కోల్పోయింది. స్వదేశంలో జరిగిన మూడు మ్యాచ్‌ల సిరీస్‌లో శ్రీలంక 2-0తో టీమిండియాను ఓడించింది. అయితే వన్డే టీమ్ ర్యాంకింగ్స్‌లో భారత జట్టు అగ్రస్థానంలో కొనసాగుతోంది.

అదే సమయంలో శ్రీలంక పర్యటనలో భారత కెప్టెన్ రోహిత్ శర్మ మెరుగైన బ్యాటింగ్‌తో ప్రయోజనం పొందగా.. స్టార్ బ్యాట్స్‌మెన్ విరాట్ కోహ్లీ ఒక స్థానం కోల్పోయాడు. భారత జట్టు లెఫ్టార్మ్ మణికట్టు స్పిన్నర్ కుల్దీప్ యాదవ్ ఐసీసీ వన్డే బౌలింగ్ ర్యాంకింగ్స్‌లో ఐదు స్థానాలు ఎగబాకాడు.

ICC ODI టీమ్ ర్యాంకింగ్స్ లో భారత జట్టు అగ్రస్థానాన్ని ఆక్రమించింది. రోహిత్ శర్మ నేతృత్వంలోని భారత జట్టు 118 పాయింట్లతో అగ్రస్థానంలో ఉంది. ఆస్ట్రేలియా జట్టు 116 పాయింట్లతో రెండో స్థానంలో ఉంది. దక్షిణాఫ్రికా 112 పాయింట్లతో మూడో స్థానంలో ఉంది. పాకిస్థాన్ 106 పాయింట్లతో నాలుగో స్థానంలో ఉంది. న్యూజిలాండ్ జట్టు టాప్-5 ర్యాంక్‌ను ద‌క్కించుకుంది.

ఐసీసీ వన్డే బ్యాటింగ్ ర్యాంకింగ్స్‌లో.. పాకిస్థాన్ ఆటగాడు బాబర్ అజామ్ నంబర్-1లో ఉన్నాడు. భారత ఓపెనర్ శుభ్‌మన్ గిల్ 782 పాయింట్లతో రెండో స్థానంలో కొనసాగుతున్నాడు. భారత కెప్టెన్ రోహిత్ శర్మ ఒక స్థానం ఎగబాకి మూడో స్థానానికి చేరుకున్నాడు. హిట్‌మ్యాన్‌కు 763 పాయింట్లు ఉన్నాయి. రోహిత్ శర్మ విరాట్ కోహ్లిని ఒక స్థానం వెన‌క్కి నెట్టాడు. విరాట్ కోహ్లీ 752 పాయింట్లతో నాలుగో స్థానంలో ఉన్నాడు. ఐర్లాండ్‌కు చెందిన హ్యారీ టెక్టర్ 746 పాయింట్లతో టాప్-5 లో చోటు ద‌క్కించుకున్నాడు.

ఐసీసీ వన్డే బౌలింగ్ ర్యాంకింగ్స్‌ను పరిశీలిస్తే.. దక్షిణాఫ్రికా అనుభవజ్ఞుడైన స్పిన్నర్ కేశవ్ మహరాజ్ 716 పాయింట్లతో అగ్రస్థానంలో ఉన్నాడు. ఆస్ట్రేలియాకు చెందిన జోష్ హేజిల్‌వుడ్, ఆడమ్ జంపా వరుసగా రెండు, మూడు స్థానాల్లో ఉన్నారు. భారత మణికట్టు స్పిన్నర్ కుల్దీప్ యాదవ్ ఐదు స్థానాలు ఎగబాకి నాలుగో స్థానంలో నిలిచాడు. భారత పేసర్ మహ్మద్ సిరాజ్ టాప్-5 జాబితాలో చోటు ద‌క్కించుకున్నాడు.