హార్దిక్ బంతులు వృధా చేశాడు.. గంభీర్ తీసుకున్న ఆ నిర్ణయం త‌ప్పు.. ఓట‌మిపై మాజీ క్రికెటర్ల విమ‌ర్శ‌లు

భారత్‌తో జరిగిన మూడో టీ20 మ్యాచ్‌లో ఇంగ్లండ్ క్రికెట్ జట్టు 26 పరుగుల తేడాతో విజయం సాధించింది. రాజ్‌కోట్‌ వేదికగా జరిగిన ఈ మ్యాచ్‌లో తొలుత బ్యాటింగ్‌ చేసిన ఇంగ్లండ్‌ నిర్ణీత 20 ఓవర్లలో 9 వికెట్ల నష్టానికి 171 పరుగులు చేసింది. అనంతరం బ్యాటింగ్‌కు దిగిన భారత జట్టు 20 ఓవర్లలో 9 వికెట్ల నష్టానికి 146 పరుగులు చేయగలిగింది.

భారత్ తరఫున స్పిన్నర్ వరుణ్ చక్రవర్తి 5 వికెట్లు పడగొట్టి అందరి హృదయాలను గెలుచుకున్నాడు. అయితే భారత బ్యాటింగ్ యూనిట్ విఫలమైంది. మ్యాచ్‌లో ఓటమి తర్వాత భారత మాజీ క్రికెటర్ పార్థివ్ పటేల్ హార్దిక్ పాండ్యాను టార్గెట్ చేశాడు. కోచ్ గౌతమ్ గంభీర్ నిర్ణయంపై కూడా అతను ప్రశ్నలు లేవనెత్తాడు.

ఇంగ్లండ్‌తో రాజ్‌కోట్‌లో జరిగిన మూడో T20I మ్యాచ్‌లో భారత బ్యాట్స్‌మెన్ చాలా నిరాశపరిచారు. 9వ ఓవర్ నుంచి 16వ ఓవర్ వరకు బ్యాట్స్‌మెన్ 40 పరుగులు మాత్రమే చేయగలిగారు.

హార్దిక్ పాండ్యా మైదానంలో చాలా బంతులను వృధా చేయ‌డం కనిపించింది, దీని కారణంగా జట్టుపై ఒత్తిడితో పాటు నెట్ రన్ రేట్ పెరిగింది. హార్దిక్ 35 బంతుల్లో 1 ఫోర్, 2 సిక్సర్ల సాయంతో 40 పరుగులు చేశాడు. అతని ఇన్నింగ్స్ పట్ల అసంతృప్తిగా ఉన్న పార్థివ్ పటేల్.. స్టార్ స్పోర్ట్స్‌లో మాట్లాడుతూ.. అతనిని విమర్శించాడు.

"T20 ఇంటర్నేషనల్స్‌లో.. క్రీజులో సెట్ అవడానికి ఎవరూ 20 నుండి 25 బంతులు తీసుకోరు. సెట్ అవ‌డానికి మీకు సమయం అవసరమని నేను అర్థం చేసుకున్నాను.. కానీ స్ట్రైక్‌ని తిప్పాలి. హార్దిక్ 35 బంతుల్లో 40 పరుగులు చేసి ఉండవచ్చు. పరుగులు చేశాడు.. కానీ అతను ఇన్నింగ్స్ ప్రారంభంలో చాలా డాట్ బాల్స్ ఆడాడు.

ఇంగ్లండ్‌ మాజీ కెప్టెన్‌ కెవిన్‌ పీటర్సన్ కూడా భారత్‌ బ్యాటింగ్‌ ఆర్డర్‌పై అసంతృప్తిగా ఉన్నాడు. కోచ్ గౌతం గంభీర్ నిర్ణయంపై ఆయన ప్రశ్నలు సంధించారు. గంభీర్‌ 8వ నంబర్‌కు బదులుగా ధృవ్‌ జురైల్‌ను ముందుగా బ్యాటింగ్‌కు పంపి ఉండాల్సిందని అన్నాడు. భారత్‌కు బ్యాటింగ్ ఆర్డర్ సరిగ్గా లేదు. ధ్రువ్ జురెల్ అనుభవజ్ఞుడైన బ్యాట్స్‌మన్. లెఫ్ట్-రైట్ కాంబినేషన్‌లో.. అతని ఆర్డర్‌ను తగ్గించడం సరికాదు.. ముందు ముందు మీ బ్యాట్స్‌మెన్ బ్యాటింగ్‌లో రాణిస్తార‌ని నాకు గట్టి నమ్మకం ఉందని పీటర్సన్ అన్నాడు.