ఆ రోజు ధోనీ కూడా ఆనందాన్ని ఆపుకోలేకపోయాడు..!

టీమిండియా లెగ్ స్పిన్నర్ అమిత్ మిశ్రా ఛాంపియన్స్ ట్రోఫీ 2013 జ్ఞాపకాలను గుర్తుచేశాడు. ఇంగ్లండ్‌పై ఆఖరి విజయం తర్వాత.. భారత డ్రెస్సింగ్ రూమ్‌లో పెద్ద‌ వేడుక జరిగిందని, ఇది ఇప్పటి వరకు ఆటగాళ్లు మరచిపోలేకపోయారని చెప్పాడు. 'కెప్టెన్ కూల్' మహేంద్ర సింగ్ ధోనీ కూడా ఆ రాత్రి చాలా సంతోషంగా కనిపించాడని మిశ్రా వెల్లడించాడు.

23 జూన్ 2013న బర్మింగ్‌హామ్‌లో భారత్, ఇంగ్లండ్ మధ్య ఫైనల్ మ్యాచ్ జరిగింది. వర్షం కారణంగా ఈ మ్యాచ్‌ను 20-20 ఓవర్లకు కుదించారు. తొలుత బ్యాటింగ్‌కు దిగిన భారత్ తొలుత విరాట్ కోహ్లీ (43), శిఖర్ ధావన్ (31) పరుగులు చేశారు. కానీ ఒక్కసారిగా భారత ఇన్నింగ్స్ తడబడడంతో స్కోరు 66/5గా మారింది. ఈ క్లిష్ట సమయంలో రవీంద్ర జడేజా 33 పరుగులు చేసి జట్టును ఆదుకుని భారత్ స్కోరును 129/7కు తీసుకెళ్లాడు. దీంతో ఇంగ్లండ్ జట్టు విజయానికి 130 పరుగులు చేయాల్సి ఉంది. అయితే.. భారత బౌలర్లు అద్భుత ప్రదర్శన చేశారు.

అశ్విన్, జడేజాలు చాలా పొదుపుగా బౌలింగ్ చేసి రెండేసి వికెట్లు పడగొట్టారు. ఆఖరి ఓవర్లలో మ్యాచ్ ఉత్కంఠ రేపిన తరుణంలో భారత్ కేవలం 5 పరుగుల తేడాతో ఇంగ్లండ్‌ను ఓడించి ఛాంపియన్స్ ట్రోఫీని కైవసం చేసుకుంది.

ఈ చారిత్రాత్మక విజయం తర్వాత ఆటగాళ్లు తమ గదుల్లోకి వెళ్లలేదని అమిత్ మిశ్రా వార్తా సంస్థ ANIకి తెలిపారు. ఆ త‌ర్వాత‌.. అందరూ డ్రెస్సింగ్ రూమ్‌లో ఉండి 3-4 గంటల పాటు వేడుకలు కొనసాగించారు. "ధోని (ఎంఎస్ ధోని) ఎప్పుడూ ప్రశాంతంగా ఉంటాడు, కానీ ఆ రోజు ఆనందం అతని ముఖంలో కూడా స్పష్టంగా కనిపించింది. అతను కూడా అందరితో సరదాగా గడిపాడు.. ఆ క్షణంలో జీవించాడు" అని చెప్పాడు.

డ్రెస్సింగ్ రూమ్‌లో ఆటగాళ్ళు చాలా ఆనందంగా గ‌డిపారు.. జోకులు వేశారు.. ఒక‌రినొక‌రు కౌగిలించుకున్నారు.. డ్యాన్స్ చేశారు. విరాట్ కోహ్లి చేసిన ఫేమస్ 'గంగ్నమ్ స్టైల్' డ్యాన్స్ ఇప్పటికీ అభిమానులకు గుర్తుండే ఉంటుంది. మైదానం నుంచి డ్రెస్సింగ్‌ రూం వరకు నినాదాలు ఆ విజయాన్ని ప్రత్యేకం చేశాయని పేర్కొన్నాడు.