ఇక‌పై కాంగ్రెస్‌లో అంతర్గత కలహాలకు తావు లేదన్న ఆ ఇద్ద‌రు నేత‌లు

అందరిని కలుపుకొని వెళ్లే సంప్రదాయంతో టీపీసీసీగా ఎన్నికైన రేవంత్ రెడ్డి వెళ్తున్నారని ఎమ్మెల్యే జ‌గ్గారెడ్డి అన్నారు. ఈ రోజు జ‌గ్గారెడ్డిని రేవంత్ రెడ్డి మ‌ర్యాద‌పూర్వ‌కంగా క‌లుసుకున్నారు. ఈ సంద‌ర్భంగా జ‌గ్గారెడ్డి మాట్లాడుతూ.. టీపీసీసీగా ఎన్నికైన రేవంత్ రెడ్డికి శుభాకాంక్షలు తెలిపారు. ఇక కాంగ్రెస్‌లో పదవుల కోసం పోటీలు పడే సమయం ముగిసిందని.. పార్టీ అధిష్టానం నిర్ణయం మేరకు పార్టీ అభివృద్ధి కోసం కృషి చేస్తానని అన్నారు. టీఆర్ఎస్- బీజేపీ రెండు ఒక్కటేన‌ని.. రాత్రులు కలుస్తాయి- పగలు కొట్టుకుంటాయని విమ‌ర్శించారు. టీఆర్ఎస్ ప్రభుత్వం నిరుద్యోగులను తుంగలో తొక్కిందని.. నిరుద్యోగ సమస్యల పోరాటమా? పాదయాత్రనా అనేది నిర్ణయం తీసుకోవాలని అన్నారు. రేవంత్ రెడ్డి అంటే సోనియాగాంధీ- రాహుల్ గాంధీ అన్నట్లేన‌ని.. పార్టీలో అంతర్గత కలహాలు ఇక నుంచి ఉండవని జ‌గ్గారెడ్డి అన్నారు. ఇకనుంచి కాంగ్రెస్ పార్టీ పోరాటం టీఆర్ఎస్-బీజేపీపై మాత్రమేన‌ని.. రేవంత్ రెడ్డికి నా పూర్తి సహకారం ఉంటుందని స్ప‌ష్టం చేశారు. రేపు గాంధీ భవన్ లో జరిగే ప్రోగ్రాం కు హాజరు అవుతానని తెలిపారు.

ఈ సంద‌ర్భంగా రేవంత్ రెడ్డి మాట్లాడుతూ.. జగ్గారెడ్డి నాకు అత్యంత ఆప్తుడు, మిత్రుడని తెలిపారు. జగ్గారెడ్డిని కలిసే సందర్భంగా వరుణుడు కరుణించాడని అన్నారు. కాంగ్రెస్ పార్టీ కార్యకర్తల అభిమాన నాయకులు జగ్గారెడ్డి అని రేవంత్ అన్నారు. రేపు టీపీసీసీ నూతన కమిటీ ఛార్జ్ తీసుకోబోతుందని అన్నారు. ఏడేళ్ల కేసీఆర్ పాలనలో తెలంగాణ ప్రజలకు స్వేచ్చలేదని.. ఉద్యమకారుల పై ఇంకా కేసులు ఎత్తెయ్యలేదని రేవంత్ అన్నారు. కేసీఆర్ కుటుంబం తెలంగాణ ప్రజలను పట్టి పిడిస్తున్నదని.. రేపటి నుంచి కుటుంబాలను వదిలేసి రెండేళ్లు ప్రజల కోసం పనిచేసే విదంగా కాంగ్రెస్ పార్టీ కార్యాచరణ ఉంటుందని రేవంత్ అన్నారు. నిరుద్యోగ సమస్య పై ఎల్లుండి అందరం కలిసి నిర్ణయం తీసుకుంటామని.. రాఫెల్ కుంభకోణంపై పార్లమెంట్ లో కాంగ్రెస్ పార్టీ ప్రభుత్వాన్ని ప్రశ్నించనుందని అన్నారు. కాంగ్రెస్ లో అంతర్గత కలహాలకు ఇక నుంచి తావు లేదని అన్నారు.