చైల్డ్ పోర్నోగ్రఫీ చూడటం నేరం కాదు.. కర్ణాటక హైకోర్టు సంచ‌ల‌న తీర్పు

ఇంటర్‌నెట్ ద్వారా చిన్నారుల అశ్లీల చిత్రాలను వీక్షించడం ఐటీ చట్టం ప్రకారం నేరం కాదని కర్ణాటక హైకోర్టు ఇటీవల ఇచ్చిన తీర్పులో పేర్కొంది. ఇలాంటి చిత్రాలను వీక్షించినందుకు తనపై నమోదైన కేసును రద్దు చేయాలని కోరుతూ హోస్కోట్‌కు చెందిన ఎన్‌ ఇనాయతుల్లా దాఖలు చేసిన పిటిషన్‌ను విచారించిన జస్టిస్‌ ఎం. నాగప్రసన్న నేతృత్వంలోని ధర్మాసనం ఈ నిర్ణయం తీసుకుంది.

ఇన్ఫర్మేషన్ టెక్నాలజీ చట్టంలోని సెక్షన్ 67బి ప్రకారం.. ఎలక్ట్రానిక్ మార్గాల ద్వారా పిల్లల అశ్లీల కంటెంట్‌ను సృష్టించి.. పంపిణీ చేసినందుకు శిక్ష వర్తిస్తుందని కోర్టు అభిప్రాయపడింది. పిటిషనర్ చైల్డ్ పోర్నోగ్రఫీని రూపొందించలేదు లేదా షేర్ చేయలేదు.. దానిని వీక్షించారు మాత్ర‌మే.. కాబట్టి.. ఈ సెక్షన్ కింద నేరానికి ఎటువంటి ఆధారాలు లేవని కోర్టు గుర్తించింది.

“ఇన్ఫర్మేషన్ టెక్నాలజీ చట్టంలోని సెక్షన్ 67Bలో పేర్కొన్నట్లుగా పిల్లల అశ్లీల చిత్రాలను సిద్ధం చేసినందుకు, ఎలక్ట్రానిక్ పరికరాల ద్వారా షేర్ చేస్తే ఎవరైనా శిక్షకు అర్హులు. పిటిషన‌ర్‌ చైల్డ్ పోర్నోగ్రఫీని రూపొందించలేదు. ఎవరికీ షేర్ చేయలేదు, కేవలం వీక్షించబడింది. కాబట్టి సెక్షన్ 67బి కింద ఎలాంటి నేరం లేదు’’ అని ధర్మాసనం పేర్కొంది.

పిటిషనర్ ఇనాయతుల్లా తన మొబైల్ ఫోన్‌లో మార్చి 23, 2023న మధ్యాహ్నం 3:30 నుండి 4:40 గంటల మధ్య పిల్లల అశ్లీల చిత్రాలను వీక్షించాడని ఆరోపించారు. ఈ సమాచారాన్ని నేషనల్ క్రైమ్ రికార్డ్స్ బ్యూరో (NCRB) మహిళలు, పిల్లలపై లైంగిక హింసను నిరోధించే లక్ష్యంతో ప్రభుత్వ పోర్టల్ ద్వారా నివేదించింది.

బెంగుళూరు సిటీ CID యూనిట్ నివేదికను ధృవీకరించింది. ఇనాయతుల్లా కంటెంట్ వీక్షకుడిగా గుర్తించింది. దీంతో బెంగళూరు సైబర్ క్రైమ్ పోలీస్ స్టేషన్‌లో 3 మే 2023న సెక్షన్ 67B కింద ఫిర్యాదు నమోదైంది.

కోర్టులో పిటిషనర్ తరపు న్యాయవాది వాదిస్తూ.. “పిటిషనర్ పిల్లల అశ్లీల చిత్రాలను చూడటం అలవాటు చేసుకున్నాడు. ఎలాంటి వీడియోను రూపొందించి.. ఎవరితోనూ పంచుకోలేదు. కాబట్టి ఆ కేసును రద్దు చేయాలని కోరాడు.

ప్రాసిక్యూషన్ అభ్యంతరం తెలుపుతూ.. “పిల్లలకు సంబంధించిన అశ్లీల వీడియోలను తాను చూసినట్లు పిటిషనర్ అంగీకరించాడు. కాబట్టి ఈ ప్రక్రియను కొనసాగించడానికి అనుమతించకూడదు. అందువలన కేసు కొన‌సాగాల‌న్నారు.

అభ్యంతరాలు ఉన్నప్పటికీ.. పిల్లల అశ్లీల చిత్రాలను రూపొందించడం లేదా షేర్‌చేయ‌డం లాంటి నేరం జరగలేదు కాబట్టి.. కేసును కొనసాగించడం చట్టాన్ని దుర్వినియోగం చేసినట్లేనని కోర్టు తీర్పు చెప్పింది. “పిటిషనర్ చైల్డ్ పోర్నోగ్రఫీ చూడటానికి బానిస. పోర్న్ వీడియోలు చూస్తారు. ఈ ఘటన వల్ల ఎలాంటి నేరం జరగలేదు. అందువల్ల పిటిషనర్‌పై అనుకోకుండా కేసు నమోదు చేయబడింది. ఈ కేసు కొనసాగితే అది చట్టాన్ని దుర్వినియోగం చేసినట్లే అవుతుంది” అని కేసును రద్దు చేయాలని ఆదేశించింది.

ఇదిలావుంటే.. చిన్న‌పిల్ల‌లు, మ‌హిళ‌ల‌పై జ‌రుగుతున్న ఆకృత్యాలు ఎక్కువ‌వుతున్న నేప‌థ్యంలో.. ఇటువంటి తీర్పుపై జ‌నాల నుంచి అభ్యంత‌రం వ్య‌క్త‌మ‌య్యే అవ‌కాశం లేక‌పోలేదు.