చేతులకు బేడీలు ఉన్న ఖైదీకి మద్యం కొనుక్కోవడంలో సహాయపడిన పోలీసులు

ఉత్తరప్రదేశ్‌లోని హమీర్‌పూర్ జిల్లాలో ఒక ఖైదీకి మద్యం కొనుక్కోవడంలో సహాయం చేశారు పోలీసులు. అతడి చేతులకు బేడీలు ఉండగా.. మద్యం షాపులో మద్యం కొంటున్నట్లు చూపించే వీడియో వైరల్ అవుతోంది. ఖైదీకి మద్యం కొనుక్కోవడానికి ఒక పోలీసు అధికారి సహాయం చేస్తున్నట్లు ఆ వీడియోలో స్పష్టంగా అర్థం అవుతోంది. ఈ ఘటన కలకలం రేపడంతో విచారణకు ఆదేశించారు. క్రిమినల్ ప్రొసీజర్ కోడ్ (CrPC) సెక్షన్ 151 కింద కేసు నమోదైన ఖైదీని పోలీస్ స్టేషన్ నుండి కోర్టుకు తీసుకువెళుతుండగా ఈ సంఘటన జరిగింది.

అతనికి ఇద్దరు పోలీసులు ఎస్కార్ట్‌గా ఉన్నారు. దారిలో ఖైదీ మద్యం షాపు ముందు ఆగి మద్యం కొనేందుకు వెళ్లాడు. అతడు కొంటూ ఉండగా పోలీసులలో ఒకరు అతనికి సహకరించారని ఆరోపించారు. ఈ తతంగమంతా దారిన వెళ్తున్న ఓ వ్యక్తి కెమెరాలో బంధించాడు. సోషల్ మీడియాలో వైరల్ కావడంతో ఈ ఘటన వెలుగులోకి రావడంతో అధికారులు విచారణకు ఆదేశించారు. ఖైదీకి మద్యం కొనేందుకు సహకరించిన పోలీసులపై చర్యలు తీసుకోవాలని ఉన్నతాధికారులు ఆదేశాలు జారీ చేశారు.