ఘోరం..ప్లాట్‌ఫారమ్‌పైకి దూసుకెళ్లిన ఆర్‌టీసీ బస్సు, రెండేళ్ల బాలుడు మృతి (video)

కర్ణాటకలోని హవేరి సెంట్రల్ బస్ స్టాండ్‌లో బుధవారం ఘోర ప్రమాదం జరిగింది. ప్రయాణికులతో రద్దీగా ఉన్న సమయంలో ఒక కేఎస్‌ఆర్‌టీసీ (KSRTC) బస్సు అదుపు తప్పి ప్లాట్‌ఫారమ్ మీదకు దూసుకెళ్లింది. ఈ ఘటనలో రెండు ఏళ్ల బాలుడు అక్కడికక్కడే ప్రాణాలు కోల్పోగా, బస్సు కోసం వేచి చూస్తున్న పలువురు ప్రయాణికులు తీవ్రంగా గాయపడ్డారు.

బస్సు సాధారణ మార్గంలో రాకుండా ఒక్కసారిగా ప్లాట్‌ఫారమ్ వైపు దూసుకురావడంతో, అక్కడున్న వారు తప్పించుకునే లోపే ఈ ఘోరం జరిగిందని ప్రత్యక్ష సాక్షులు తెలిపారు. సమాచారం అందుకున్న అత్యవసర సేవా సిబ్బంది వెంటనే అక్కడికి చేరుకుని గాయపడిన వారిని చికిత్స నిమిత్తం సమీపంలోని ప్రభుత్వ ఆసుపత్రికి తరలించారు. ఈ ప్రమాదం స్థానికంగా తీవ్ర విషాదాన్ని నింపింది.