పెను ప్రమాదం నుండి తప్పించుకున్న తేజస్వీ యాదవ్

రాష్ట్రీయ జనతాదళ్ (ఆర్‌జెడి) నాయకుడు, బీహార్ ప్రతిపక్ష నాయకుడు తేజస్వి యాదవ్ తృటిలో పెను ప్రమాదం నుండి తప్పించుకున్నారు. శనివారం తెల్లవారుజామున వైశాలి జిల్లాలో వేగంగా వస్తున్న ట్రక్కు కాన్వాయ్‌లోని రెండు వాహనాలను ఢీకొట్టింది. అదృష్టవశాత్తూ, ఈ సంఘటనలో యాదవ్ కు ఎలాంటి గాయాలు అవ్వలేదు.

పాట్నా-ముజఫర్‌పూర్ జాతీయ రహదారిపై గోరౌల్ సమీపంలో తెల్లవారుజామున 12:30 గంటల ప్రాంతంలో ఈ ప్రమాదం జరిగింది, యాదవ్, అతని బృందం ఒక కార్యక్రమం తర్వాత మాధేపుర నుండి పాట్నాకు తిరిగి వస్తుండగా కాన్వాయ్ టీ కోసం ఆపారు. ఇంతలో స్పీడ్ గా వచ్చిన ట్రక్కు కాన్వాయ్ ను ఢీకొట్టింది. ఈ ప్రమాదంలో ముగ్గురు భద్రతా సిబ్బంది గాయపడ్డారు. వారిని వెంటనే సమీపంలోని ప్రభుత్వ ఆసుపత్రికి తరలించారు. వారి పరిస్థితి స్థిరంగా ఉంది. “మేము టీ కోసం ఆగి ఉండగా, వేగంగా వచ్చిన ఓ ట్రక్కు నా కాన్వాయ్‌లోని రెండు వాహనాలను ఢీకొట్టింది. నా కారు కేవలం ఐదు అడుగుల దూరంలో ప్రమాదం జరిగింది. నేను వెంటనే జిల్లా పోలీసులను, అధికారులను సంప్రదించాను” అని తేజస్వి యాదవ్ విలేకరులకు తెలిపారు.