తాజ్ మహల్‌కు బాంబు బెదిరింపు

తాజ్ మహల్‌కు బాంబు బెదిరింపు వచ్చింది. బెదిరింపు ఈ-మెయిల్ రావడంతో తాజ్ వద్ద పోలీసులు అప్రమత్తమయ్యారు. బాంబు నిర్వీర్య దళం, ఇతర బృందాలు వచ్చి విచారణలో నిమగ్నమై ఉన్నాయి. బెదిరింపు ఈ-మెయిల్‌ వచ్చిందని నగర డీసీపీ సూరజ్‌ రాయ్‌ తెలిపారు. ఈ విష‌య‌మై విచారణ జరుగుతోంది. ఈ మెయిల్‌ ఎవరు పంపారు, ఎక్కడి నుంచి పంపారు అనే విషయాలను పోలీసులు పరిశీలిస్తున్నారు. తాజ్ మహల్ చుట్టూ ఇప్పటికే భద్రత ఉంది. బెదిరింపులు రావ‌డంతో మరింత భ‌ద్ర‌త‌ను పెంచారు. తాజ్ ప‌రిస‌ర ప్రాంతాల్లో తనిఖీలు జరుగుతున్నాయి. ఇప్ప‌టి వ‌ర‌కూ ఎలాంటి అనుమానాస్పద వస్తువులు క‌నిపించ‌లేదని పోలీసులు వెల్ల‌డించారు.

పర్యాటక శాఖ అధికారిక ఈ-మెయిల్ ఐడీకి ఈ బెదిరింపు వచ్చినట్లు సమాచారం. తాజ్ మహల్ లోపల బాంబు పెట్టినట్లు ఈ మెయిల్ లో రాసి ఉంది. ఉదయం తొమ్మిది గంటలకు బాంబు పేలుడు సంభ‌విస్తుంద‌ని.. ఆపగలిగితే ఆపండి అంటూ సవాల్ విసిరారు. ఈ-మెయిల్ చదివిన పర్యాటక శాఖ ఉద్యోగులు ఉన్నతాధికారులకు సమాచారం అందించారు. దీంతో వెంటనే స్థానిక పోలీసులకు, సీఐఎస్‌ఎఫ్‌, పురావస్తు శాఖ అధికారులకు ఈ విషయంపై సమాచారం అందించారు.

సమాచారం అందిన వెంటనే అన్ని విభాగాల్లో ఉత్కంఠ నెలకొంది. వెంటనే అన్ని శాఖల అధికారులు సంఘటనా స్థలానికి చేరుకుని సంయుక్తంగా విచారణ చేపట్టారు. ఈ క్రమంలో డాగ్ స్క్వాడ్, బాంబ్ స్క్వాడ్ బృందాలను పిలిపించి తాజ్‌మహల్ లోపల, బయట ముమ్మరంగా విచారణ చేస్తున్నారు. అనుమానం వచ్చినా కూడా చాలా చోట్ల నేలను తవ్వి బాంబులను సోదా చేశారు. పోలీసు వర్గాల సమాచారం ప్రకారం.. తాజ్ మహల్ కాంప్లెక్స్‌లో బాంబు గురించి ఇప్పటివరకు ఎటువంటి ఆధారాలు కనుగొనబడలేదు.