'అండ‌గా ఉంటాం'.. ఐపీఎస్ పురాణ్ కుమార్ భార్యకు సోనియా గాంధీ లేఖ

ఆత్మహత్య చేసుకున్న ఐపీఎస్ అధికారి వై.పూరన్ కుమార్ భార్యకు కాంగ్రెస్ అధినేత్రి సోనియా గాంధీ లేఖ రాశారు. అధికారంలో ఉన్నవారి పక్షపాత వైఖరి అత్యంత సీనియర్ అధికారులకు కూడా సామాజిక న్యాయాన్ని దూరం చేస్తుందని పూరన్ కుమార్ మరణం గుర్తుచేస్తుందని అన్నారు. సోనియా గాంధీ పూరన్ కుమార్ భార్య, బ్యూరోక్రాట్ అమ్నీత్ పి కుమార్‌కు రాసిన లేఖలో.. త‌న‌తో పాటు దేశంలోని లక్షలాది మంది ప్రజలు పూరన్ కుమార్‌కు న్యాయం చేసే మార్గంలో ఆమెకు అండగా నిలుస్తున్నారని అన్నారు.

"మీ భర్త, సీనియర్ ఐపిఎస్ అధికారి వై పురాణ్ కుమార్ విషాద మరణ వార్త దిగ్భ్రాంతికరమైనది. చాలా బాధాకరం. ఈ కష్ట సమయంలో మీకు, మీ కుటుంబ సభ్యులందరికీ నా హృదయపూర్వక సానుభూతి" అని ఆమె తన లేఖలో పేర్కొంది. ఈనాటికీ అధికారంలో ఉన్నవారి పక్షపాత వైఖరి సామాజిక న్యాయాన్ని కూడా అందకుండా చేస్తుందని వై. పురాణ్ కుమార్ మరణం మనకు గుర్తు చేస్తుంది. ఈ న్యాయ మార్గంలో నేను, దేశంలోని లక్షలాది మంది ప్రజలు మీకు అండగా నిలుస్తున్నాం. ఈ క్లిష్ట పరిస్థితిలో దేవుడు మీకు సహనం, ధైర్యం, శక్తిని ప్రసాదిస్తాడు.

ఈ ఆత్మహత్య కేసును విచారించేందుకు చండీగఢ్ పోలీసులు శుక్రవారం ఆరుగురు సభ్యులతో కూడిన ప్రత్యేక దర్యాప్తు బృందాన్ని (సిట్) ఏర్పాటు చేశారు. ఎఫ్‌ఐఆర్‌లోని అసంపూర్ణ సమాచారాన్ని కుమార్ భార్య ప్రశ్నించారు. పోస్ట్‌మార్టం నిర్వహించడానికి అతని కుటుంబం ఇంకా అనుమతి ఇవ్వలేదు. కుమార్ ఇటీవలే రోహ్‌తక్‌లోని సునారియాలో ఉన్న ఇన్‌స్పెక్టర్ జనరల్ ఆఫ్ పోలీస్ ట్రైనింగ్ సెంటర్ (PTC)గా నియమించబడ్డారు. ఆయ‌న‌ సూసైడ్ నోట్‌ను రాసి ఆత్మ‌హ‌త్య చేసుకున్నారు. అందులో సీనియర్ అధికారులను పేర్ల‌ను రాశారు. సంవత్సరాలుగా తాను ఎదుర్కొన్న మానసిక వేధింపులు, అవమానాల గురించి వివరించాడు.

హర్యానా డీజీపీ శత్రుజిత్ కపూర్, రోహ్‌తక్ ఎస్పీ నరేంద్ర బిజార్నియాతో సహా ఎనిమిది మంది సీనియర్ ఐపీఎస్ అధికారులు తనను వేధింపులకు గురి చేశారని, పరువు తీశారని కుమార్ తన ఎనిమిది పేజీల నోట్‌లో ఆరోపించారు. 2001 బ్యాచ్ ఇండియన్ పోలీస్ సర్వీస్ (IPS) అధికారి కుమార్ మంగళవారం చండీగఢ్ సెక్టార్ 11లోని తన నివాసంలో కాల్చుకుని ఆత్మహత్య చేసుకున్నాడు. అతని భార్య హర్యానా ప్రభుత్వంలో సీనియర్ IAS అధికారి కావ‌డం విశేషం.