షిండే ప్రభుత్వంలో ఫడ్నవీస్ 'హోం శాఖ' నిర్వ‌హించారు.. ఇప్పుడు అదే మాకు ఇవ్వండి..!

మహారాష్ట్రలో కొత్త ప్రభుత్వం ఏర్పాటైంది. ముఖ్యమంత్రిగా దేవేంద్ర ఫడ్నవీస్ ప్రమాణ స్వీకారం చేశారు. సీఎం పదవిపై ఏకగ్రీవం తర్వాత హోం శాఖ విషయంలో మహాయుతిలో ఇంకా వార్ నడుస్తోంది. తమకు హోం శాఖ కావాలని శివసేవ చాలాసార్లు స్పష్టంగా చెప్పింది, కానీ బీజేపీ మాత్రం దానిని తమ‌ వద్దే ఉంచుకోవాలనుకుంటోంది. ఇదిలా ఉంటే.. ఇప్పుడు దీనిపై శివసేన అధినేత పెద్ద ఎత్తున వాదనలు వినిపించారు.

ఉప ముఖ్యమంత్రి ఏక్‌నాథ్ షిండే నేతృత్వంలోని శివసేన పార్టీ ఇప్పటికీ ముఖ్యమైన హోం శాఖపై మొండిగా ఉందని మరోసారి పునరుద్ఘాటించింది. బీజేపీ నుండి అదే డిమాండ్ స్ప‌ష్టంగా ఉంది. శివసేన ఎమ్మెల్యే భరత్ గోగావాలే మాట్లాడుతూ.. శాఖల కేటాయింపుపై ముగ్గురు మహాయుతి మిత్రపక్షాలు మాట్లాడుతున్నాయన్నారు. ఫడ్నవీస్ ఉప ముఖ్యమంత్రిగా ఉన్నప్పుడు (షిండే ప్రభుత్వంలో) హోం శాఖను కూడా నిర్వహించారని గోగావాలే చెప్పినట్లు వార్తా సంస్థ పిటిఐ పేర్కొంది. ఇప్పుడు అదే షిండే డిమాండ్ చేయడంతో చర్చ జరుగుతుంది. ప్రధానమంత్రి నరేంద్ర మోదీ, కేంద్ర హోం మంత్రి అమిత్ షా ముందు కూడా ఈ డిమాండ్ చేయబడింది. రాబోయే రెండు రోజుల్లో శాఖలపై చర్చలు పూర్తవుతాయని మేము ఆశిస్తున్నాము అన్నారు.

నివేదికల ప్రకారం.. షిండే డిప్యూటీ సీఎం కావడానికి సిద్ధంగా లేరని.. అయితే శివసేన నాయకులు ఆయనను ఆ పదవికి ఒప్పించారు. అయితే హోం శాఖపై ఆయ‌న‌ మొండిగా ఉన్నారు. గత నెలలో జరిగిన అసెంబ్లీ ఎన్నికల్లో భారతీయ జనతా పార్టీ, షిండే శివసేన, అజిత్ పవార్ నేషనలిస్ట్ కాంగ్రెస్(NCP) మహా కూటమి బలమైన విజయాన్ని నమోదు చేసింది. ఫలితాలు వెలువడిన 12 రోజుల తర్వాత ఉప ముఖ్యమంత్రులు ఏక్‌నాథ్ షిండే, పవార్‌లతో కలిసి బీజేపీకి చెందిన దేవేంద్ర ఫడ్నవీస్ గురువారం ముఖ్యమంత్రిగా ప్రమాణ స్వీకారం చేశారు.