అమ్మాయి 2-వీలర్ నంబర్ ప్లేట్‌పై 'సెక్స్' అనే ప‌దం.. వేధింపులకు గురిచేస్తున్నారంటూ..

'సెక్స్' అనే పదాన్ని కలిగి ఉన్న వాహనం రిజిస్ట్రేషన్ నంబర్‌ను మార్చాలని కోరుతూ ఢిల్లీ మహిళా కమిషన్ (DCW) శుక్రవారం ఢిల్లీ RTOకి నోటీసు జారీ చేసింది. ఇటీవల స్కూటీని కొనుగోలు చేసిన ఒక అమ్మాయి తన వాహనం రిజిస్ట్రేషన్ నంబర్‌లో 'సెక్స్' అనే పదాన్ని కలిగి ఉన్న అలాట్‌మెంట్ సిరీస్‌ను పొందడం ద్వారా ఈ విషయాన్ని DCW దృష్టికి తీసుకెళ్లింది. కేటాయించిన రిజిస్ట్రేషన్ నంబర్ సిరీస్ కారణంగా ప్రజలు తనను వెక్కిరించడం, ఆటపట్టించడంతో తీవ్ర వేధింపులకు గురవుతున్నట్లు బాలిక కమిషన్‌కు తెలిపింది. దీని వల్ల తాను రాకపోకల్లో చాలా సమస్యలను ఎదుర్కొంటున్నానని.. అవసరమైన పని కోసం బయటకు వెళ్లలేకపోతున్నానని ఆమె చెప్పింది. ఈ విషయాన్ని పరిగణనలోకి తీసుకున్న కమిషన్ ద్విచక్ర వాహనం యొక్క రిజిస్ట్రేషన్ నంబర్‌ను వెంటనే మార్చాలని కోరుతూ రవాణా శాఖకు నోటీసు జారీ చేసింది.

డీసీడబ్ల్యూ చీఫ్ స్వాతి మలివాల్ నోటీసు జారీ చేస్తూ.. 'సెక్స్' అనే పదాన్ని కలిగి ఉన్న ఈ కేటాయింపు సిరీస్‌లో రిజిస్టర్ చేయబడిన మొత్తం వాహనాల సంఖ్యను సమర్పించాలని రవాణా శాఖను కోరాం. ప్రజలు ఈ విధ‌మైన ఆలోచ‌నా ధృక్ఫ‌థాన్ని క‌లిగిఉండ‌టం దురదృష్టకరం. అమ్మాయిని దుర్భాషలాడుతూ వేధింపులకు గురిచేయ‌డం దారుణం. ఆ అమ్మాయి ఇక బాధపడకూడదని ఈ సమస్యను పరిష్కరించేందుకు రవాణా శాఖకు నాలుగు రోజుల సమయం ఇచ్చామ‌ని పేర్కొన్నారు. ఈ క్రమంలో రిజిస్టర్ అయిన మొత్తం వాహనాల సంఖ్యను సమర్పించాలని రవాణా శాఖను కమిషన్ కోరింది. అంతేకాకుండా, డిసిడబ్ల్యు డిపార్ట్‌మెంట్ ద్వారా అందిన అన్ని ఫిర్యాదుల వివరాలను కోరింది. ఎట్టకేలకు రవాణా శాఖ నుంచి నాలుగు రోజుల్లోగా దీనిపై సమగ్ర కార్యాచరణ నివేదిక ఇవ్వాలని కమిషన్ కోరింది.

ఢిల్లీ కోసం DL తర్వాత జిల్లాను సూచించే సంఖ్య, వాహనం రకం కోసం ఒక అక్షరం, దాని తర్వాత తాజా సిరీస్‌ను సూచించే 2 అక్షరాలు, ఆ సిరీస్‌లో 4 అంకెల ప్రత్యేక సంఖ్య ఉంటాయి. ఢిల్లీలో ద్విచక్ర వాహనాలను 'S' అక్షరంతో సూచిస్తారు. ఒక సాధారణ నంబర్ ప్లేట్ ఇలా ఉంటుంది: DL 2 C AD 1234. ఢిల్లీకి DL, ఈస్ట్ డిస్ట్రిక్ట్‌కి 2, C ఫర్ కార్ లేదా టూ వీలర్స్ కోసం S, నంబర్ సిరీస్ కోసం AD తర్వాత నంబర్ ఉంటుంది. ప్ర‌స్తుతం ఢిల్లీలో ద్విచక్ర వాహనాల నంబర్ ప్లేట్‌లపై 'S' అక్షరం తర్వాత 'EX' అక్షరం ఉంటుంది.