మణిపూర్‌లో ఉద్రిక్త‌త‌.. 5 రోజుల పాటు ఇంటర్నెట్ బంద్‌

మ‌ణిపూర్‌లో మంగళవారం రాజ్‌భవన్‌ వైపు వెళ్లేందుకు ప్రయత్నించిన విద్యార్థులు, మహిళా ఆందోళనకారులు, భద్రతా బలగాల మధ్య ఘర్షణ జరిగింది. పరిస్థితిని అదుపు చేసేందుకు టియర్ గ్యాస్ షెల్స్ ప్రయోగించాల్సి వచ్చింది. మణిపూర్ ప్రభుత్వ భద్రతా సలహాదారుని, డీజీపీని తొలగించాలని ఆందోళనకారులు డిమాండ్ చేస్తున్నారు. సోమవారం తెల్లవారుజామున ఖ్వైరాంబండ్ మహిళా బజార్‌లో సోమవారం నుండి క్యాంప్‌ చేస్తున్న వందలాది మంది విద్యార్థులు బీటీ రోడ్డు మీదుగా రాజ్‌భవన్ వైపు ర్యాలీగా వెళ్లేందుకు ప్రయత్నించారు. అయితే కాంగ్రెస్ భవన్ సమీపంలో భద్రతా బలగాలు అడ్డుకున్నాయి.

మణిపూర్ యూనివర్సిటీ విద్యార్థులు నిరసన ర్యాలీ చేపట్టి కేంద్ర హోంమంత్రి అమిత్ షా దిష్టిబొమ్మను దహనం చేశారు. కాగా, ప్రస్తుత పరిస్థితుల దృష్ట్యా ఇంఫాల్ తూర్పు, పశ్చిమ జిల్లాల్లో కర్ఫ్యూ విధించారు. BNSS సెక్షన్ 163 (2) ప్రకారం.. తౌబాల్‌లో నిషేధాజ్ఞలు విధించబడ్డాయి. ఐదు రోజుల పాటు రాష్ట్రవ్యాప్తంగా ఇంటర్నెట్‌ను నిలిపివేశారు.

నోటిఫికేషన్ ప్రకారం.. మణిపూర్ రాష్ట్రంలోని ప్రాదేశిక అధికార పరిధిలో సెప్టెంబర్ 10 మధ్యాహ్నం 3 గంటల నుండి సెప్టెంబర్ 15 మధ్యాహ్నం 3 గంటల వరకు VSAT, బ్రాడ్‌బ్యాండ్, VPN సేవలతో సహా ఇంటర్నెట్, మొబైల్ డేటా సేవలు తాత్కాలికంగా నిలిపివేయమని ఆర్డర్ లో పేర్కొన్నారు.

రాష్ట్ర ప్రభుత్వ హోం శాఖ జారీ చేసిన ఉత్తర్వు.. 'మణిపూర్ రాష్ట్రంలో ప్రస్తుత శాంతిభద్రతల పరిస్థితుల దృష్ట్యా, కొంతమంది సంఘ వ్యతిరేక వ్యక్తులు చిత్రాలు, అసభ్య పదజాలం, ద్వేషపూరిత వీడియో సందేశాలను వ్యాప్తి చేసే అవకాశం ఉంది. ప్రజల మనోభావాలను మంటగలిపేందుకు, సోషల్ మీడియాను విస్తృతంగా ఉపయోగించుకోవచ్చు. ఇది మణిపూర్‌లో శాంతిభద్రతలపై తీవ్ర ప్రభావం చూపే అవకాశం ఉంది. కంటెంట్, తప్పుడు పుకార్లను ప్రేరేపించడం వలన ప్రాణనష్టం, ప్రభుత్వ, ప్రైవేట్ ఆస్తులకు నష్టం, శాంతి, మత సామరస్యానికి హాని కలిగించవచ్చు. టాబ్లెట్‌లు, కంప్యూటర్‌లు, మొబైల్ ఫోన్‌లు మొదలైన వివిధ ఎలక్ట్రానిక్ పరికరాలలో WhatsApp, Facebook, Instagram, Twitter వంటి సోషల్ మీడియా ప్లాట్‌ఫారమ్‌ల ద్వారా తప్పుడు సమాచారం, తప్పుడు పుకార్ల వ్యాప్తిని ఆపడం, ప్రేక్షకులను సమీకరించడానికి బల్క్ SMS పంపడం వంటి వాటిని అరిక‌ట్టేందుకు ఈ చ‌ర్య‌లు తీసుకున్న‌ట్లు ఉత్తర్వుల్లో పేర్కొంది.