'రిజర్వేషన్ అనేది రైలు కంపార్ట్‌మెంట్ లాంటిది'.. సుప్రీం కీల‌క వ్యాఖ్యలు
దేశంలో కుల ఆధారిత రిజర్వేషన్లకు సంబంధించి సుప్రీంకోర్టు న్యాయమూర్తి ఒక ముఖ్యమైన వ్యాఖ్య చేశారు.
By Medi Samrat
దేశంలో కుల ఆధారిత రిజర్వేషన్లకు సంబంధించి సుప్రీంకోర్టు న్యాయమూర్తి ఒక ముఖ్యమైన వ్యాఖ్య చేశారు. రిజర్వేషన్ అనేది రైలు కంపార్ట్‌మెంట్ లాగా మారిందని, ఆ కంపార్ట్‌మెంట్ ఎక్కే వ్యక్తులు ఇతరులను అందులోకి అనుమతించరని న్యాయమూర్తి అన్నారు. మహారాష్ట్రలో స్థానిక సంస్థల ఎన్నికలలో ఇతర వెనుకబడిన తరగతుల (OBC) రిజర్వేషన్లకు సంబంధించిన కేసును విచారిస్తున్న సందర్భంగా సుప్రీంకోర్టు న్యాయమూర్తి జస్టిస్ సూర్యకాంత్ ఈ వ్యాఖ్యలు చేశారు.
మహారాష్ట్రలో స్థానిక సంస్థల ఎన్నికలు చివరిసారిగా 2016-2017లో జరిగాయి. ఇతర వెనుకబడిన తరగతుల (OBC) అభ్యర్థుల కోటాపై న్యాయ పోరాటం ఎన్నిక‌ల జాప్యానికి ప్రధాన కారణం. 2021లో OBCలకు 27 శాతం కోటా అమలు చేస్తూ మహారాష్ట్ర ప్రభుత్వం జారీ చేసిన ఆర్డినెన్స్‌ను సుప్రీంకోర్టు కొట్టివేసింది.
పిటిషనర్ తరపున హాజరైన సీనియర్ న్యాయవాది గోపాల్ శంకర్ నారాయణన్ వాదిస్తూ.. రాష్ట్ర బంధియా కమిషన్ స్థానిక సంస్థల ఎన్నికలలో ఇతర వెనుకబడిన తరగతులకు (OBCలు) రిజర్వేషన్లు కల్పించిందని.. వారు రాజకీయంగా వెనుకబడ్డారో లేదో నిర్ధారించకుండానే ఇలా జ‌రిగింద‌ని వాదించారు. రాజకీయ వెనుకబాటుతనం సామాజిక, విద్యా వెనుకబాటుతనానికి భిన్నంగా ఉంటుందని.. OBCలను స్వయంచాలకంగా రాజకీయంగా వెనుకబడిన వారిగా పరిగణించలేమని ఆయన వాదించారు.
దీనిపై వ్యాఖ్యానిస్తూ జస్టిస్ సూర్యకాంత్ ఇలా అన్నారు.. విషయం ఏమిటంటే ఈ దేశంలో రిజర్వేషన్ వ్యాపారం.. రైల్వేల మాదిరిగా మారింది. బోగీలోకి ప్రవేశించిన వారు మరెవరూ ప్రవేశించకూడదని కోరుకుంటారు. ఆట అంతా అంతే.. పిటిషనర్ కూడా అదే ఆట ఆడతాడున్నాడ‌ని వ్యాఖ్యానించారు. దీనిపై శంకరనారాయణన్ మాట్లాడుతూ.. ఇప్పుడు వెనుక భాగంలో కూడా బోగీలను జోడిస్తున్నట్లు తెలిపారు.
సమ్మిళితత్వ సూత్రాన్ని అనుసరించి రాష్ట్రాలు మరిన్ని తరగతులను గుర్తించాల్సి ఉంటుందని జస్టిస్ కాంత్ మౌఖికంగా వ్యాఖ్యానించారు. సామాజికంగా వెనుకబడిన తరగతి, రాజకీయంగా వెనుకబడిన తరగతి మరియు ఆర్థికంగా వెనుకబడిన తరగతి ఉంటాయి. వారికి ప్రయోజనాలను ఎందుకు తిరస్కరించాలి? అది ఒక ప్రత్యేక కుటుంబం లేదా సమూహాలకే ఎందుకు పరిమితం కావాలి? అని ప్ర‌శ్నించారు.
విచారణ సందర్భంగా.. ఓబీసీ రిజర్వేషన్ల సమస్య కారణంగా మహారాష్ట్ర రాష్ట్రంలోని స్థానిక సంస్థలకు చాలా కాలంగా పెండింగ్‌లో ఉన్న ఎన్నికలను మరింత ఆలస్యం చేయలేమని ధర్మాసనం పేర్కొంది. రాష్ట్ర ప్ర‌భుత్వ అభిప్రాయాలను వినడానికి ధర్మాసనం విచారణను వాయిదా వేసింది.
