సిద్ధరామయ్యను సీఎం చేయడం వెనుక చాలా కారణాలు..!

కర్ణాటకలో కాంగ్రెస్‌ పాలన మొద‌లైంది. ప్రమాణస్వీకారం చేయడంతో రాష్ట్రానికి కొత్త ముఖ్యమంత్రిగా సిద్ధరామయ్య, డిప్యూటీ సీఎంగా డీకే శివకుమార్ నియమితులయ్యారు. వీరితో పాటు 8 మంది ఎమ్మెల్యేలు కూడా మంత్రులుగా ప్రమాణం చేశారు. సిద్ధరామయ్యను సీఎం చేయడం వెనుక చాలా కారణాలు ఉన్నాయని.. ఆ కారణంగా డీకే శివకుమార్‌తో పాటు పలువురు నేతలకు సీఎం పదవిని పార్టీ అప్పగించలేదు. సిద్దరామయ్య రాజకీయ చరిత్ర ఏమిటో.. పార్టీ ఆయనను ఎందుకు విస్మరించలేక పోయిందో తెలుసుకుందాం.

సిద్ధరామయ్య 1948 ఆగస్టు 12న మైసూరులోని వరుణలోని సిద్ధరామహుండిలో జన్మించారు. వ్యవసాయ కుటుంబం నుంచి వచ్చిన ఆయన బాల్యాన్ని అత్యంత పేదరికంలో గడిపారు. రాష్ట్రంలో మూడో అతిపెద్ద జనాభా కలిగిన కురుబ సామాజిక వర్గానికి చెందినవారు సిద్ధరామయ్య. 2024 లోక్‌సభ ఎన్నికలను దృష్టిలో ఉంచుకుని కాంగ్రెస్ పార్టీ కర్ణాటక సీఎంను ఖరారు చేసింది. సిద్ధరామయ్య కర్ణాటకలోని ఓబీసీ, Sఎస్సీ, ముస్లిం వర్గాల్లో ప్రముఖ నాయకుడిగా పరిగణించబడ్డారు. దీంతో ఆయన స్థానంలో వేరొకరిని సీఎం చేసేందుకు పార్టీ అంగీకరించలేదు. సిద్ధరామయ్య విష‌యంలో అధిష్టానం నిర్ణ‌యం ప్రభావవంతంగా ఉంటుందని పార్టీ విశ్వసిస్తోంది.

1983లో తొలిసారిగా చాముండేశ్వరి అసెంబ్లీ స్థానం నుంచి లోక్‌దళ్ టికెట్‌పై సిద్ధరామయ్య గెలుపొందారు. ఆ తర్వాత సిద్ధరామయ్య జనతా పార్టీలో చేరి పలుమార్లు మంత్రిగా కూడా చేశారు. 1999లో జనతాదళ్ చీలిపోయి సిద్ధరామయ్య జనతాదళ్ సెక్యులర్‌లో చేరారు. ఆ తర్వాత 2004 ఎన్నికల్లో గెలిచి కాంగ్రెస్, జేడీఎస్ ప్రభుత్వంలో డిప్యూటీ సీఎం అయ్యారు. అయితే జేడీఎస్‌పై అసంతృప్తితో ఉండ‌టంతో ఆయనను పార్టీ నుంచి బహిష్కరించారు. ఆ తర్వాత 2006లో కాంగ్రెస్‌లో చేరారు.

2013 నుంచి 2018 వరకు కాంగ్రెస్ ప్రభుత్వంలో సిద్ధరామయ్య సీఎంగా ఉన్నారు. ఈ క్రమంలోనే ప్రజల్లో కూడా మంచి గుర్తింపు తెచ్చుకున్నారు. సిద్ధరామయ్యకు మంచి పరిపాలకుడుగా పేరుంది. ఈ ఎన్నికలను ఆయన తన చివరి ఎన్నికలుగా కూడా అభివర్ణించారు. అందుకే కాంగ్రెస్‌ ఈసారి కూడా డీకే శివకుమార్‌ను కాద‌ని సీఎం పదవిని సిద్ధ‌రామ‌య్య‌కు కేటాయించింది.