సైన్యం, పోలీసులది ఒకటే లక్ష్యం : రాజ్‌నాథ్ సింగ్

ఢిల్లీలో రక్షణ మంత్రి రాజ్‌నాథ్ సింగ్ జాతీయ భద్రత యొక్క ప్రాముఖ్యతను నొక్కి చెప్పారు. సైన్యం, పోలీసుల వేదికలు భిన్నంగా ఉండవచ్చు.. కానీ వారి లక్ష్యం ఒకటే - దేశ భద్రత అని అన్నారు. మనం 'అమృత్ కాల్'లోకి ప్రవేశించి 2047 నాటికి 'అభివృద్ధి చెందిన భారతదేశం' లక్ష్యం వైపు వెళుతున్నందున భారతదేశ అంతర్గత, బాహ్య భద్రతను సమతుల్యం చేయడం గతంలో కంటే చాలా ముఖ్యమైనదిగా మారిందని ఆయన అన్నారు.

నేషనల్ పోలీస్ మెమోరియల్‌లో జరిగిన పోలీసు స్మారక దినోత్సవ కార్యక్రమంలో రాజ్‌నాథ్ సింగ్ తన అనుభవాలను పంచుకుంటూ హోంమంత్రిగా పోలీసుల పనితీరును, రక్షణ మంత్రిగా ఆర్మీ కార్యకలాపాలను నిశితంగా గమనించాన‌ని అన్నారు. ఏదైనా తప్పు జరిగితే, పోలీసులు తమకు అండగా నిలుస్తారని ఈరోజు దేశప్రజలు విశ్వసిస్తున్నారని ఆయన అన్నారు. పోలీసులపై ప్రజల్లో పెరుగుతున్న విశ్వాసాన్ని ఆయన నొక్కిచెప్పారు. ఇది సానుకూల మార్పు అని పేర్కొన్నారు.

నక్సలిజాన్ని అంతర్గత భద్రతకు దీర్ఘకాలిక సవాలుగా రక్షణ మంత్రి అభివర్ణించారు. అయితే ఈ సమస్యను త్వ‌ర‌లోనే రూపుమాపేందుకు సంకల్పంతో ప‌నిచేస్తున్నామ‌ని పునరుద్ఘాటించారు. పోలీసులు, సీఆర్‌పీఎఫ్‌, బీఎస్‌ఎఫ్‌, అన్ని పారామిలటరీ బలగాలు, స్థానిక పరిపాలన సంయుక్త కృషితో నక్సలిజాన్ని నియంత్రిస్తున్నామని చెప్పారు.

ఒకప్పుడు నక్సలైట్ల భీభత్సం ఉన్న ప్రాంతాల్లో ఇప్పుడు రోడ్లు, ఆసుపత్రులు, పాఠశాలలు, కళాశాలలు నిర్మిస్తున్నారని రాజ్‌నాథ్‌ సింగ్‌ గర్వంగా చెప్పారు. గతంలో రెడ్ కారిడార్లుగా పిలిచే నక్సల్స్ ప్రభావిత ప్రాంతాలు ఇప్పుడు అభివృద్ధి కారిడార్లుగా మారుతున్నాయని అన్నారు. ప్రస్తుతం నక్సలిజం ప్రభావిత జిల్లాల సంఖ్య చాలా తక్కువగా ఉందని, వచ్చే ఏడాది మార్చి నాటికి పూర్తిగా నిర్మూలిస్తామని చెప్పారు. ప్రభుత్వం, భద్రతా బలగాల సమన్వయ ప్రయత్నాల ఫలితమే ఈ విజయం అన్నారు.

చాలా కాలంగా సమాజం, దేశం పోలీసుల సహకారాన్ని పూర్తిగా అంగీకరించడం లేదని రక్షణ మంత్రి విచారం వ్యక్తం చేశారు. అయితే, 2018లో ప్రధాని నరేంద్ర మోదీ నేతృత్వంలో జాతీయ పోలీసు స్మారకం ఏర్పాటు చేశామన్నారు. దీంతో పాటు పోలీసులకు అత్యాధునిక ఆయుధాలు, మెరుగైన సౌకర్యాలు కల్పించారు. దేశం అనేక సవాళ్లను ఎదుర్కొంటుందని, అయితే వనరులు పరిమితంగానే ఉన్నాయని ఆయన నొక్కి చెప్పారు. అందువల్ల భద్రతా సంస్థల మధ్య సమన్వయం మరియు ఏకీకరణ ద్వారా మాత్రమే ఈ వనరుల వినియోగం సాధ్యమవుతుందన్నారు.