బిట్‌కాయిన్‌ను కరెన్సీగా గుర్తించమన్న కేంద్రం.!

క్రిప్టోకరెన్సీపై కేంద్ర ప్రభుత్వం కీలక ప్రకటన చేసింది. బిట్‌కాయిన్‌ను కరెన్సీగా గుర్తించేందుకు ఎలాంటి ప్రతిపాదన లేదని కేంద్ర ఆర్థిక మంత్రిత్వ శాఖ పేర్కొంది. ఈ మేరకు లోక్‌సభలో కేంద్ర ఆర్థిక మంత్రి నిర్మలా సీతారామన్‌ లిఖిత పూర్వక సమాధానం ఇచ్చారు. బిట్‌ కాయిన్‌ లావాదేవీలకు సంబంధించి ఎలాంటి డేటాను కూడా ప్రభుత్వం సేకరించడం లేదని తెలిపారు. క్రిప్టో బిల్లును ఈ శీతాకాల పార్లమెంట్‌ సమావేశాల్లో ప్రవేశపెట్టాలని కేంద్ర ప్రభుత్వం భావిస్తోంది. ఇటీవల కేంద్రం ప్రభుత్వం.. బిట్‌కాయిన్‌ లావాదేవీల నియంత్రణ కోసం ఎలాంటి రెగ్యులేటరీ వ్యవస్థ అవసరం లేదన్న అభిప్రాయాన్ని వ్యక్తం చేసింది. దేశంలో బిట్‌కాయిన్‌ను కరెన్సీగా గుర్తించే ప్రతిపాదన ప్రభుత్వం వద్ద ఉందా లేదా అనే ప్రశ్నకు.. ఆర్థిక మంత్రి "లేదు సార్" అని సమాధానం చెప్పారు.

బిట్‌కాయిన్ అనేది డిజిటల్ కరెన్సీ. ఇది బ్యాంకులు, క్రెడిట్ కార్డ్ జారీ చేసేవారు లేదా ఇతర మూడవ పక్షాలతో సంబంధం లేకుండా వస్తువులు, సేవలను కొనుగోలు చేయడానికి, డబ్బును మార్పిడి చేసుకోవడానికి అనుమతిస్తుంది. ఇది 2008లో గుర్తించబడని ప్రోగ్రామర్ల సమూహం ద్వారా క్రిప్టోకరెన్సీగా అలాగే ఎలక్ట్రానిక్ చెల్లింపు వ్యవస్థగా పరిచయం చేయబడింది. ఎటువంటి మధ్యవర్తి లేకుండా పీర్-టు-పీర్ లావాదేవీలు జరిగే మొదటి వికేంద్రీకృత డిజిటల్ కరెన్సీ ఇది.

ఇదిలా ఉండగా, ప్రస్తుతం జరుగుతున్న పార్లమెంట్ శీతాకాల సమావేశాల్లో క్రిప్టోకరెన్సీ మరియు రెగ్యులేషన్ ఆఫ్ అఫీషియల్ డిజిటల్ కరెన్సీ బిల్లు 2021ని ప్రవేశపెట్టాలని ప్రభుత్వం యోచిస్తోంది. ఆర్‌బిఐ అధికారిక డిజిటల్ కరెన్సీని అనుమతించేటప్పుడు అంతర్లీన సాంకేతికతలను ప్రోత్సహించడానికి కొన్ని ప్రైవేట్ క్రిప్టోకరెన్సీలను మినహాయించి అన్నింటిని నిషేధించాలని బిల్లు కోరుతోంది. ప్రస్తుత ఆర్థిక సంవత్సరం ఏప్రిల్-సెప్టెంబర్ కాలంలో మంత్రిత్వ శాఖలు, శాఖలు రూ.2.29 లక్షల కోట్లను మూలధన వ్యయంగా ఖర్చు చేశాయని సీతారామన్ మరో ప్రశ్నకు సమాధానంగా చెప్పారు.