నాగాలాండ్ అసెంబ్లీ ఎన్నికల షెడ్యూల్‌ను ప్రకటించిన ఈసీ
Nagaland Assembly election to be held on February 27, results on March 2. నాగాలాండ్‌లో అసెంబ్లీ ఎన్నికల షెడ్యూల్‌ను ఎన్నికల సంఘం బుధవారం ప్రకటించింది.
By Medi Samrat Published on 18 Jan 2023 11:30 AM GMT
నాగాలాండ్‌లో అసెంబ్లీ ఎన్నికల షెడ్యూల్‌ను ఎన్నికల సంఘం బుధవారం ప్రకటించింది. ప్రస్తుతం నేషనలిస్ట్ డెమోక్రటిక్ ప్రోగ్రెసివ్ పార్టీ (ఎన్‌డిపిపి) అధికారంలో ఉన్న ఈశాన్య రాష్ట్రం నాగాలాండ్‌లో ఫిబ్రవరి 27 న ఎన్నికలు జ‌రుగ‌నున్నాయి. నాగాలాండ్‌లో ఒకే దశలో అసెంబ్లీ ఎన్నికలు జరగనున్నాయి. ఫిబ్రవరి 27న ఓట్ల పోలింగ్, మార్చి 2న ఓట్ల లెక్కింపు జరుగుతుంది.
నోటిఫికేషన్ జారీ తేదీ : జనవరి 31
నామినేషన్ దాఖలుకు చివరి తేదీ: ఫిబ్రవరి 7
నామినేష‌న్ల పరిశీలన తేదీ: ఫిబ్రవరి 8
నామినేషన్ ఉపసంహరణకు చివరి తేదీ : ఫిబ్రవరి 10
పోలింగ్ తేదీ : ఫిబ్రవరి 27
కౌంటింగ్ తేదీ : మార్చి 2
నాగాలాండ్ శాసనసభలో 60 స్థానాలు ఉన్నాయి. అధికార కూటమిగా యునైటెడ్ డెమోక్రటిక్ అలయన్స్ (UDA)లో NDPP, BJP , నాగా పీపుల్స్ ఫ్రంట్ (NPF) ఉన్నాయి. 2018 ఎన్నికలకు ముందు ఏర్పడిన ఎన్‌డిపిపి-బిజెపి కూటమి నాగాలాండ్‌లో బలంగా కొనసాగుతోంది. నాగాలాండ్‌లో ప్రతిపక్షం లేదు. 21 మంది NPF ఎమ్మెల్యేలు UDAలో చేరారు. 2018లో ఎన్‌పీఎఫ్‌కి 26, ఎన్‌డీపీపీకి 18, బీజేపీకి 12, ఎన్‌పీపీకి 2, జేడీయూకి 1, స్వతంత్రుల‌కు 1 సీటు వచ్చాయి. బిజెపి రాష్ట్ర ఇన్‌ఛార్జ్ నలిన్ కోహ్లి ప్రకారం.. బిజెపి, ఎన్‌డిపిపితో పొత్తును కొనసాగించాలని చూస్తోంది. ఈ ఎన్నిక‌ల‌లో 40:20 సీట్ల షేరింగ్ మాడ్యూల్‌తో ముందుకు సాగవచ్చని ఊహాగానాలు వెలువ‌డుతున్నాయి.
