మేము ముస్లిములం.. క‌ష్టంలో 'అల్లాహు అక్బర్' అంటాము : మెహబూబా ముఫ్తీ

జమ్మూ కాశ్మీర్ పీపుల్స్ డెమోక్రటిక్ పార్టీ (పీడీపీ) చీఫ్ మెహబూబా ముఫ్తీ, జిప్ లైన్ ఆపరేటర్‌ను 'అల్లాహు అక్బర్' అని నినాదాలు చేసినందుకు ఎన్ఐఏ ప్రశ్నించడం గురించి మాట్లాడారు. ఇది సహజ ప్రతిచర్య అని, కొంతమంది మతతత్వ వ్యక్తులు సోషల్ మీడియాలో ద్వేషాన్ని వ్యాప్తి చేస్తున్నారని ఆరోపించారు.

"సోషల్ మీడియాలో కొంతమంది చాలా మతతత్వవాదులు ఉన్నారు. హిందువులు "జై శ్రీ రామ్" అని చెప్పినట్లుగా, ముస్లింలు "అల్లాహు అక్బర్" అని అంటారు. మనకు ఏదైనా కష్టం వచ్చినప్పుడు, "అల్లాహు అక్బర్" అని అంటాము, అది సహజం. సోషల్ మీడియాలో విషం చిమ్ముతున్న వారిపై భారత ప్రభుత్వం కఠిన చర్యలు తీసుకోవాలి" అని మెహబూబా ముఫ్తీ ANI కి చెప్పారు.

పహల్గామ్ ఉగ్రవాద దాడి తర్వాత ఒక వీడియోలో "అల్లాహు అక్బర్" అని అరిచిన జిప్‌లైన్ ఆపరేటర్‌ను జాతీయ దర్యాప్తు సంస్థ, జమ్మూ కాశ్మీర్ పోలీసులు ప్రశ్నించడానికి పిలిచారు. దాడి తర్వాత సంఘటనా స్థలంలో ఉన్న ప్రతి ఒక్కరినీ దర్యాప్తు సంస్థలు విచారణ కోసం పిలిపించాయి. పహల్గామ్ నుండి రిషి భట్ అనే వ్యక్తి రికార్డ్ చేసిన వీడియో ఆన్‌లైన్‌లో కనిపించిన తర్వాత ఇది జరిగింది. జిప్‌లైన్ ఆపరేటర్ "అల్లాహు అక్బర్" అని అరిచిన వెంటనే కాల్పులు జరిగాయని టూరిస్ట్‌ రిషి భట్ అన్నారు.