చారిత్రక యుద్ధ విమానం MiG-21 కు వీడ్కోలు ప‌లికిన భారత వైమానిక దళం

భారత వైమానిక దళం శుక్రవారం అధికారికంగా అత్యంత ప్రసిద్ధ చెందిన‌, చారిత్రక యుద్ధ విమానం MiG-21 ను(వీడ్కోలు) విరమించుకుంది. ఈ కార్యక్రమంలో రక్షణ మంత్రి రాజ్‌నాథ్ సింగ్ కూడా పాల్గొన్నారు. ఈ విమానం 1960లో సేవలను ప్రారంభించింది. దాదాపు ఆరు దశాబ్దాల పాటు భారత వైమానిక దళం యొక్క శక్తి, ధైర్యానికి ఈ విమానం చిహ్నంగా నిలిచింది.

MiG-21 అనేక యుద్ధాలలో భారత వైమానిక దళం శక్తిని నిరూపించింది. 1965 మరియు 1971లో జరిగిన ఇండో-పాక్ యుద్ధాల్లో మిగ్-21 కీలక పాత్ర పోషించింది. ముఖ్యంగా 1971లో ఢాకాలోని గవర్నర్ నివాసంపై దాడి చేయడం ద్వారా పాకిస్థాన్ ఓటమికి, బంగ్లాదేశ్ విముక్తికి దోహదపడింది.

1999 కార్గిల్ యుద్ధంలో ఈ విమానం పాకిస్తాన్ నియంత్రణ కేంద్రాలను లక్ష్యంగా చేసుకుంది. కార్గిల్‌లో వాయు ఆధిపత్యాన్ని నిర్ధారించింది. ఆపరేషన్ బాలాకోట్ 2019లో గ్రూప్ కెప్టెన్ అభినందన్ వర్థమాన్ మిగ్-21 ద్వారా పాకిస్థాన్ ఎఫ్-16 విమానాలను కూల్చివేశారు. MiG-21లు ఆపరేషన్ సిందూర్‌లో మోహరింపబడ్డాయి. మిషన్‌లో కీలక పాత్ర పోషించాయి.

రిటైర్డ్ స్క్వాడ్రన్ లీడర్ ఎస్‌ఎస్ త్యాగి మాట్లాడుతూ మిగ్-21 పైలట్‌లను వేగంగా, చురుగ్గా, ధైర్యంగా తయారు చేసిందన్నారు. నేను ఈ విమానాల‌లో ఎగురుతూనే ఎక్కువ భాగాన్ని పూర్తి చేశాను. ఈ విమానం నా జీవితంలో భాగమైపోయిందని గ్రూప్ కెప్టెన్ మాలిక్ అన్నారు. దానికి వీడ్కోలు పలకడం ఎమోషనల్ మూమెంట్ అన్నారు.

వింగ్ కమాండర్ జైదీప్ సింగ్ మాట్లాడుతూ.. MiG-21 ఆపరేషన్ సవాలుతో కూడుకున్నదని, అందుకే దీనిని ఫ్లయింగ్ శవపేటిక అని పిలుస్తారు, అయితే దాని వేగవంతమైన, స్థిరమైన ప్రవర్తన ప్రతి పైలట్ రాణించటానికి సహాయపడిందన్నారు.

MiG-21 ఎప్పటికప్పుడు అనేక అప్‌డేట్‌ల‌తో వ‌చ్చేవి. చివరి వెర్షన్ MiG-21 బైసన్ న్యూ రాడార్, ఏవియానిక్స్ మరియు హై-ఇంపాక్ట్ Vympel R-73 క్షిపణులను కలిగి ఉంది. ఈ విమానం ఈ రోజు కూడా దగ్గరి పోరాటాన్ని చేయగలదు. MiG-21 అనేక ఆధునిక విమానాలను ఓడించడం ద్వారా భారత వైమానిక దళం యొక్క ఆధిపత్యాన్ని నిరూపించింది.

MiG-21 స్థానంలో తేజస్ లైట్ కంబాట్ ఎయిర్‌క్రాఫ్ట్ (LCA) మార్క్ 1A రానుంది. ఈ విమానం ఆధునిక యుద్ధ అవసరాలకు అనుగుణంగా రూపొందించబడింది. ఇది మిగ్-21 వారసత్వాన్ని ముందుకు తీసుకువెళుతుంది.