మణిపూర్ అసెంబ్లీ ఎన్నికలు : ఉదయం 10 గంటల వరకు 11.68 శాతం పోలింగ్

మణిపూర్ అసెంబ్లీ ఎన్నికల తొలి దశ పోలింగ్ సోమవారం ప్రారంభమైంది. తొలి విడతగా 38 అసెంబ్లీ నియోజక వర్గాలకు నేడు పోలింగ్ జ‌రుగుతుంది. ఈ దశలో 15 మంది మహిళలు సహా మొత్తం 173 మంది అభ్యర్థులు బరిలో ఉన్నారు. ఉదయం 7 గంటలకు ప్రారంభమైన ఓటింగ్ సాయంత్రం 4 గంటల వరకు కొనసాగనుంది. కోవిడ్ పాజిటివ్ లేదా క్వారంటైన్‌లో ఉన్న ఓటర్లు చివరి గంటలో అంటే మధ్యాహ్నం 3 నుండి సాయంత్రం 4 గంటల మధ్య ఓటు వేయడానికి అనుమతించబడతారు.

ఫేజ్-1లో 1,721 పోలింగ్ స్టేషన్లలో 5,80,607 మంది పురుషులు, 6,28,657 మంది మహిళలు, 175 మంది ట్రాన్స్‌జెండర్ ఓటర్లు సహా మొత్తం 12,09,439 మంది ఓటర్లు తమ ఓటు హక్కును వినియోగించుకోనున్నారు. 60 మంది సభ్యుల మణిపూర్ అసెంబ్లీకి ఫిబ్రవరి 28, మార్చి 5 తేదీల్లో రెండు దశల్లో ఎన్నికలు జరగనున్నాయి. ఇక రాష్ట్రంలో ఉదయం 10 గంటల వరకు 11.68 శాతం పోలింగ్ నమోదైనట్లు రాష్ట్ర ఎన్నికల సంఘం సోమవారం వెల్లడించింది.