ప్రధాని మోదీని చంపుతానని బెదిరించిన వ్యక్తి అరెస్ట్
ప్రధాని నరేంద్ర మోదీని చంపుతానని బెదిరించినందుకు బీహార్‌లోని భాగల్పూర్ జిల్లాకు చెందిన 35 ఏళ్ల వ్యక్తిని అరెస్టు చేసినట్లు పోలీసులు శుక్రవారం తెలిపారు
By Medi Samrat
ప్రధాని నరేంద్ర మోదీని చంపుతానని బెదిరించినందుకు బీహార్‌లోని భాగల్పూర్ జిల్లాకు చెందిన 35 ఏళ్ల వ్యక్తిని అరెస్టు చేసినట్లు పోలీసులు శుక్రవారం తెలిపారు. నిందితుడిని గురువారం సాయంత్రం సుల్తాన్‌గంజ్ పోలీస్ స్టేషన్ పరిధిలోని మహేషి గ్రామంలో పట్టుకున్నట్లు అధికారిక ప్రకటన తెలిపింది.
"బీహార్ పర్యటనలో ఉన్న ప్రధానిని చంపేస్తానని బెదిరిస్తూ భాగల్పూర్ నుంచి భద్రతా సంస్థలకు వాట్సాప్ కాల్ వచ్చింది. బెదిరింపు కాల్ గురించి గురువారం భాగల్పూర్ సీనియర్ సూపరింటెండెంట్ ఆఫ్ పోలీస్ (SSP)కి సమాచారం అందించబడింది. ఈ విషయంపై దర్యాప్తు చేయడానికి ఒక బృందాన్ని ఏర్పాటు చేశామ‌ని పోలీసు ప్రకటన తెలిపింది.
71 ఏళ్ల మంతు చౌదరి మొబైల్ ఫోన్ నంబర్ నుంచి కాల్ చేసినట్లు ప్రాథమిక విచారణలో తేలింది. వర్చువల్ ప్రైవేట్ నెట్‌వర్క్ (VPN) ద్వారా చౌదరి మొబైల్ నంబర్ నుండి నిందితుడు సమీర్ రంజన్ వాట్సాప్ కాల్ చేసినట్లు బృందం కనుగొంది" అని భాగల్పూర్ పోలీసులు విడుదల చేసిన ప్రకటనలో తెలిపారు. విచారణలో నిందితుడు నేరాన్ని అంగీకరించాడని ఆ ప్రకటనలో పేర్కొన్నారు. ఈ విషయంపై మరింత దర్యాప్తు జరుగుతోందని పేర్కొంది.
