విమాన రంగంతో పోటీ ప‌డుతున్న‌ రైల్వేశాఖ.. ఇక ట్రైన్ హోస్టెస్ కూడా..!

సాధారణంగా విమానంలో ఎయిర్ హోస్టెస్ లను చూస్తూ ఉంటారు. ఇకపై భారతీయ రైల్వేలలో ట్రైన్ హోస్టెస్ లను చూస్తారు. భారతీయ రైల్వే సర్వీసు పరంగా విమాన రంగంతో పోటీ పడుతోంది. దీంతో ప్రీమియం రైళ్లలో విమానాల తరహాలో ఎయిర్ హోస్టెస్ లాంటి సేవలను అందించనున్నారు. ఈ రైళ్లలో ప్రజలకు ఇంటి తరహా ఆహారాన్ని కూడా రైల్వేశాఖ అందించబోతోంది. నివేదిక త్వరలో ప్రీమియం రైళ్లలో ట్రైన్ హోస్టెస్ సర్వీస్ ప్రారంభం కాబోతోందని భారతీయ రైల్వే సీనియర్ అధికారి ఒకరు చెప్పారు. వందే భారత్ ఎక్స్‌ప్రెస్, గతిమాన్ ఎక్స్‌ప్రెస్, తేజస్ ఎక్స్‌ప్రెస్ వంటి ప్రీమియం రైళ్లలో ఈ సేవ అందుబాటులో ఉంటుంది. రాజధాని ఎక్స్‌ప్రెస్ మరియు దురంతో ఎక్స్‌ప్రెస్ వంటి సుదూర ప్రీమియం రైళ్లలో ఈ సేవ అందుబాటులో ఉండదు.

స్త్రీలు మాత్రమే కాకుండా సిబ్బందిలో పురుష సభ్యులు కూడా ఉంటారు. ట్రైన్ హోస్టెస్‌లు పగటిపూట మాత్రమే సేవలు అందిస్తారు. వారిని రాత్రి పూట డ్యూటీలో పెట్టరు. విమానాలలో ఎయిర్ హోస్టెస్‌ల వలె నిపుణులుగా ఉంటారు. ఇందుకోసం రైల్వే వారందరికీ శిక్షణ ఇవ్వనుంది. భారతీయ రైల్వే మరింత మంది ప్రయాణీకులను ఆకర్షించేందుకు అనేక సంస్కరణలు చేస్తోంది. రైలు హోస్టెస్ సేవ ఈ ప్రయత్నాలలో భాగమే. ఈ హోస్టెస్‌లు ప్రయాణీకులను సీట్ల వద్దకు తీసుకువెళతారు.. ఆహారంతో పాటూ టీ వంటి వాటిని కూడా అందించనున్నారు. రైలు ప్రయాణ సమయంలో వారిని స్వాగతించడంతో పాటు ప్రయాణీకుల అవసరాలను కూడా వింటారు.

ప్రయాణికులు ఇంటివంటి ఆహారాన్ని పొందేందుకు.. అదనంగా, ప్రీమియం రైళ్లలో ప్రజలకు అందించే ఆహార నాణ్యతను మెరుగుపరిచేందుకు రైల్వే కూడా చర్యలు చేపట్టింది. కరోనా కారణంగా ఆన్‌బోర్డ్ వంట ఆపివేయబడింది, అది తిరిగి ప్రారంభించబడుతోంది. ఇప్పుడు ఈ రైళ్లలో ప్రజలకు ప్యాక్ చేసిన ఆహారానికి బదులుగా తాజా ఆహారం లభిస్తుంది.