ధర్మస్థల మిస్టరీ.. బయటపడిన అవశేషాలు..!

ప్రముఖ ఆధ్యాత్మిక క్షేత్రం ‘ధర్మస్థల' లో అనుమానాస్పద మరణాలపై దర్యాప్తు సాగుతోంది. సిట్‌ చీఫ్‌ ప్రణబ్‌ మొహంతి, డీఐజీ ఎంఎన్‌ అనుచేత్‌ ఆధ్వర్యంలో ధర్మస్థల మిస్టరీపై దర్యాప్తు కొనసాగుతోంది. ఈ కేసు దర్యాప్తులో భాగంగా పారిశుద్ధ్య కార్మికుడు చూపించిన ఆరో స్థలంలో తవ్వకాలు జరుపగా ఎముకలు బయటపడ్డాయి. పోలీసు వర్గాల సమాచారం ప్రకారం, అస్థిపంజర అవశేషాలు పురుషుడివి అయి ఉండవచ్చు.

1998- 2014 మధ్య ఆలయ పట్టణంలో మహిళలు, మైనర్ల మృతదేహాలను బలవంతంగా ఖననం చేసి దహనం చేశారని, వారిలో చాలా మందిపై లైంగిక వేధింపులు జరిగాయని మాజీ పారిశుధ్య కార్మికుడు చేసిన ఆరోపణలపై SIT దర్యాప్తులో భాగంగా ఈ అవశేషాలు కనుగొనబడ్డాయి. సంఘటన స్థలంలో ఉన్న ఫోరెన్సిక్ బృందం తదుపరి పరీక్షల కోసం అవశేషాలను భద్రపరిచింది. మరిన్ని ఆధారాలను గుర్తించడంలో సహాయపడటానికి డాగ్ స్క్వాడ్‌ను ఆ ప్రాంతానికి రప్పించారు. ఈ నిర్దిష్ట ప్రదేశాల్లో రెండు మృతదేహాలను ఖననం చేశారని ఆ వ్యక్తి ఆరోపించారు. అస్థిపంజర అవశేషాలు చాలా కుళ్ళిపోయిన స్థితిలో ఉన్నాయని, సాక్ష్యాలను సేకరించే ప్రయత్నాలను అధికారులు చేస్తున్నారు.