యూపీ ఎన్నికల ప్రచారం.. 'పుష్ప' శ్రీవల్లి పాట రీమిక్స్‌ చేసిన కాంగ్రెస్‌.. వైరల్‌ వీడియో

త్వరలో జరగనున్న ఉత్తరప్రదేశ్ అసెంబ్లీ ఎన్నికల కోసం కాంగ్రెస్ పార్టీ తన ఎన్నికల పాటను శుక్రవారం విడుదల చేసింది. తెలుగు చలనచిత్రం 'పుష్ప'లోని ప్రముఖ పాట 'చూపే బంగారమాయేనే శ్రీవల్లి' ట్యూన్‌కి సెట్ చేయబడిన పోల్ గీతం, దాని పల్లవిగా 'తూ హై గజాబ్ యూపీ.. తేరి కసం యూపీ' (మీరు అద్భుతంగా ఉన్నారు, నేను ప్రమాణం చేస్తున్నాను.. యూపీ). అంటూ పాట కొనసాగుతుంది. రాణి లక్ష్మీబాయితోతో ఎంతో గొప్ప వ్యక్తులు పోరాడిన నేల అంటూ.. యూపీ గొప్పతనాన్ని వర్ణిస్తూ పాటను రూపొందించారు. ఈ పాట ప్రస్తుతం సోషల్‌ మీడియాలో వైరల్‌ అవుతోంది. "ఉత్తరప్రదేశ్‌కు చెందినందుకు గర్విస్తున్నాను" అనే క్యాప్షన్‌తో ఉత్తరప్రదేశ్ కాంగ్రెస్ పాటను షేర్ చేసింది.

ఉత్తరప్రదేశ్ ఎన్నికలు

ఉత్తరప్రదేశ్ అసెంబ్లీ ఎన్నికలు 2022 ఫిబ్రవరి 10 నుండి ఏడు దశల్లో జరుగుతాయి. మార్చి 10న ఓట్ల లెక్కింపు జరగనుంది. ఉత్తరప్రదేశ్ (2017)లో గత అసెంబ్లీ ఎన్నికలు ఏడు దశల్లో జరిగాయి. భారతీయ జనతా పార్టీ (బిజెపి) మరియు దాని మిత్రపక్షాలు రాష్ట్రంలోని 403 అసెంబ్లీ నియోజకవర్గాలలో 312 స్థానాలను గెలుచుకున్నాయి. ఈసారి ఉత్తరప్రదేశ్ అసెంబ్లీ ఎన్నికల్లో అధికార బీజేపీ, అఖిలేష్ యాదవ్‌కు చెందిన సమాజ్‌వాదీ పార్టీ, కాంగ్రెస్, మాయావతికి చెందిన బహుజన్ సమాజ్ పార్టీల మధ్య చతుర్ముఖ పోరు జరిగే అవకాశం ఉంది. ఉత్తరప్రదేశ్‌లో కాంగ్రెస్ పార్టీ ప్రచారానికి ప్రియాంక గాంధీ నాయకత్వం వహిస్తున్నారు.