గంగూలీ కుమార్తెకు తప్పిన పెను ప్రమాదం

భారత మాజీ కెప్టెన్, బీసీసీఐ మాజీ చీఫ్ సౌరవ్ గంగూలీ కుమార్తె సనా గంగూలీ పెను ప్రమాదం నుండి తప్పించుకుంది. శుక్రవారం సాయంత్రం ఆమె ప్రయాణిస్తున్న కారును ప్రైవేట్ బస్సు ఢీకొట్టింది. ఠాకూర్‌పుకూర్‌కు వెళ్లే బెహలా చౌరస్తా క్రాసింగ్ వద్ద సాయంత్రం 6.30 గంటల ప్రాంతంలో ఈ సంఘటన జరిగింది.

సనా కారును ఓ బస్సు వెనకనుంచి ఢీ కొట్టింది. ఈ ప్రమాదంలో సనా కారుకు డ్యామేజీ అయిందని, సనాకు మాత్రం గాయాలు కాలేదని పోలీసులు తెలిపారు. ప్రమాద సమయంలో కారును గంగూలీ డ్రైవర్ నడుపుతుండగా సనా పక్క సీటులో కూర్చుంది. బెహలా చౌరస్తాలో సనా కారును ఢీ కొట్టిన బస్సు డ్రైవర్ ఆగకుండా వెళ్లిపోయాడని చెప్పారు. డ్రైవర్ తో కలిసి సనా బస్సును వెంటాడి కొంతదూరం వెళ్లిన తర్వాత అడ్డగించిందన్నారు. తమకు సమాచారం అందించడంతో వెంటనే అక్కడికి చేరుకుని బస్సు డ్రైవర్ ను అదుపులోకి తీసుకున్నామని పోలీసులు తెలిపారు.