ఢిల్లీలో అద్దె భవనంలో.. బీఆర్‌ఎస్‌ కార్యకలాపాలు ప్రారంభం

భారత్ రాష్ట్ర సమితి (బీఆర్‌ఎస్) న్యూఢిల్లీలో అద్దె ప్రాంగణంలో తన కార్యకలాపాలను ప్రారంభించనుంది. దేశ రాజధానిలో పార్టీ కార్యకలాపాలను ప్రారంభించడానికి సర్దార్ పటేల్ మార్గ్ సమీపంలో ఒక భవనాన్ని అద్దెకు తీసుకున్నట్లు పార్టీ వర్గాలు తెలిపాయి. ప్రస్తుతం వసంత్ విహార్‌లో పార్టీ శాశ్వత భవనం నిర్మాణంలో ఉంది. నిర్మాణం పూర్తి కావడానికి ఇంకా సమయం ఉండడంతో పార్టీ నేతలు తాత్కాలిక కార్యాలయానికి అద్దె భవనాన్ని ఎంచుకున్నారు.

బుధవారం పార్టీ అధ్యక్షుడు కె.చంద్రశేఖర్‌రావు అధ్యక్షతన జరిగిన టీఆర్‌ఎస్‌ జనరల్‌ బాడీ సమావేశం పార్టీ పేరును బీఆర్‌ఎస్‌గా మారుస్తూ ఏకగ్రీవంగా తీర్మానం చేసింది. దేశవ్యాప్తంగా టీఆర్‌ఎస్‌ కార్యకలాపాలను విస్తరించేందుకుగాను టీఆర్‌ఎస్‌ పేరును బీఆర్‌ఎస్‌గా మార్చాలని సర్వసభ్య సమావేశం ఏకగ్రీవంగా తీర్మానించినట్లు కేసీఆర్ ప్రకటించారు. ఈ సమావేశంలో పార్టీ రాజ్యాంగాన్ని కూడా సవరించారు. గురువారం టిఆర్‌ఎస్‌ తన పేరును బిఆర్‌ఎస్‌గా మారుస్తూ తన నిర్ణయాన్ని భారత ఎన్నికల సంఘానికి తెలియజేసింది.

మాజీ ఎంపీ బి. వినోద్‌కుమార్‌ నేతృత్వంలోని పార్టీ నేతల బృందం న్యూఢిల్లీలో భారత ఎన్నికల సంఘం (ఈసీఐ) అధికారులతో సమావేశమై టీఆర్‌ఎస్ జనరల్ బాడీ సమావేశంలో ఆమోదించిన తీర్మానం కాపీని అందజేసింది. గత ఏడాది వసంత్‌విహార్‌లో పార్టీ భవనానికి కేసీఆర్‌ శంకుస్థాపన చేశారు. సెప్టెంబరు 2న జరిగిన కార్యక్రమంలో కేసీఆర్ తన మంత్రివర్గ సహచరులు, ఎంపీలు, రాష్ట్ర శాసనసభ్యులు, పలువురు పార్టీ నేతల సమక్షంలో శంకుస్థాపన చేశారు.

ఢిల్లీలో తన కార్యాలయాన్ని ప్రారంభించిన దక్షిణ భారతదేశంలో తొలి రాజకీయ పార్టీగా టీఆర్‌ఎస్‌ నిలిచింది. 1,100 చదరపు మీటర్ల స్థలంలో రానున్న టీఆర్‌ఎస్‌ కార్యాలయాన్ని హైదరాబాద్‌లోని రాష్ట్ర ప్రధాన కార్యాలయం మాదిరిగా తెలంగాణ భవన్‌గా పిలుస్తామని అప్పట్లో ప్రకటించారు. టీఆర్‌ఎస్‌కు కొత్త పేరు పెట్టడంతో కార్యాలయం పేరు మారుస్తారో లేదో వెంటనే తెలియదు. మూడంతస్తుల భవనంలో కాన్ఫరెన్స్ హాల్, లైబ్రరీ, ఆడియో విజువల్ థియేటర్ ఉంటాయి. దేశ రాజధాని ఢిల్లీలోని పార్టీ కార్యాలయం దేశానికే పరిశోధనా కేంద్రంగా నిలుస్తుందని టీఆర్‌ఎస్‌ నేతలు అన్నారు.

తెలంగాణలో అమలవుతున్న విప్లవాత్మక సంక్షేమం, పథకాలను వెలుగులోకి తెచ్చేందుకు తెలంగాణ భవన్ ఢిల్లీ వేదికగా నిలుస్తుందని రాష్ట్ర మంత్రి వి.ప్రశాంత్ రెడ్డి తెలిపారు. టీఆర్‌ఎస్ నేతల ప్రకారం.. ఈ భవనం రూపకల్పన, అమలును కేసీఆర్ స్వయంగా పర్యవేక్షిస్తున్నారని చెప్పారు. దేశ రాజధానిలో పర్యటించే టీఆర్‌ఎస్ నాయకులు, కార్యకర్తల అవసరాలను తీర్చేందుకు ఈ భవనం ఉపయోగపడుతుంది. ఆపద సమయంలో ఢిల్లీలో ఉన్న తెలంగాణ ప్రజలకు కూడా ఇది అందుబాటులో ఉంటుందని పార్టీ వర్గాలు తెలిపాయి.

కేంద్రం గతేడాది టీఆర్‌ఎస్‌ కార్యాలయానికి స్థలం కేటాయించగా, కోవిడ్‌-19 కారణంగా శంకుస్థాపన ఆలస్యమైంది. పార్లమెంట్‌లో కనీసం ఏడుగురు సభ్యులున్న అన్ని రాజకీయ పార్టీలు ఢిల్లీలోని తమ పార్టీ కార్యాలయానికి భూమి కేటాయింపునకు అర్హులని నిర్దేశించిన నిబంధనల ప్రకారం.. భూకేటాయింపు జరిగింది. పార్లమెంట్‌లో 16 మంది సభ్యులున్న టీఆర్‌ఎస్‌కు గృహనిర్మాణ, పట్టణ వ్యవహారాల మంత్రిత్వ శాఖ ల్యాండ్‌ అండ్‌ డెవలప్‌మెంట్‌ కార్యాలయం ద్వారా 550 చదరపు మీటర్ల విస్తీర్ణంలో రెండు ప్లాట్లు కేటాయించారు.