రాష్ట్ర హోదా కోరుతూ నిరసనలు.. బీజేపీ కార్యాలయానికి నిప్పు పెట్టిన ఉద్య‌మ‌కారులు
కేంద్ర పాలిత ప్రాంతమైన లడఖ్‌లో పూర్తి రాష్ట్ర హోదా కోసం లేహ్‌లో నిరసనలు జరుగుతున్నాయి.
By - Medi Samrat
కేంద్ర పాలిత ప్రాంతమైన లడఖ్‌లో పూర్తి రాష్ట్ర హోదా కోసం లేహ్‌లో నిరసనలు జరుగుతున్నాయి. ఈ సందర్భంగా ఆందోళన చేస్తున్న విద్యార్థులకు, పోలీసులకు మధ్య తీవ్ర వాగ్వాదం చోటుచేసుకుంది. లేహ్‌లోని బీజేపీ కార్యాలయానికి నిరసనకారులు నిప్పు పెట్టారు. అంతే కాదు సీఆర్పీఎఫ్ వాహనానికి కూడా నిప్పు పెట్టారు. లడఖ్‌కు పూర్తి రాష్ట్ర హోదా కల్పించాలని, ఆరో షెడ్యూల్‌లో చేర్చాలని కోరుతూ.. సోనమ్ వాంగ్‌చుక్ గత 15 రోజులుగా నిరాహార దీక్ష చేస్తున్నారు.
వాస్తవానికి.. ఈ ఉదయం లడఖ్‌లోని లేహ్ నగరంలో కోపంతో నిరసనకారులు పోలీసులతో ఘర్షణ పడ్డారు. ఆందోళనకారులు పోలీసులపై రాళ్లు రువ్వడంతో పాటు సీఆర్పీఎఫ్ వాహనానికి నిప్పుపెట్టేంత స్థాయిలో ఉద్రిక్తత నెలకొంది. రాష్ట్ర సాధన ఉద్యమం సందర్భంగా లడఖ్‌లో జరిగిన మొదటి హింసాత్మక ఘటన ఇది.
రాష్ట్ర హోదా, ఆరో షెడ్యూల్‌లో చేర్చాలని డిమాండ్ చేస్తూ లడఖ్‌లో కొనసాగుతున్న ఆందోళన బుధవారం నాటికి 14వ రోజుకు చేరుకుంది. లేహ్‌లో ఇద్దరు మహిళా నిరసనకారులు అస్వస్థతకు గురై ఆసుపత్రిలో చేరిన తర్వాత భద్రతా బలగాలను అక్క‌డ మోహరించారు. మిస్టర్ అంచుక్, అంచుక్ డోల్మాగా గుర్తించబడిన నిరసనకారులు ప్రదర్శన సమయంలో స్పృహతప్పి పడిపోయారు. వారిని సమీపంలోని ఆసుపత్రికి తరలించారు. ఈ సంఘటన అక్క‌డ అశాంతికి దారితీసింది, ఇది లేహ్ హిల్ కౌన్సిల్ భవనంపై రాళ్లదాడికి దారితీసింది. పరిస్థితిని అదుపు చేసేందుకు భారీ సంఖ్యలో భద్రతా బలగాలను మోహరించారు. ఒక్కసారిగా ఆందోళనకారులు హింసాత్మకంగా మారి పోలీసులతో వాగ్వాదానికి దిగారు. లేహ్‌లోని బీజేపీ కార్యాలయంపై దాడి చేసి భద్రతా సిబ్బందిపై రాళ్లు రువ్వారు. నిరసనకు నాయకత్వం వహిస్తున్న వాతావరణ కార్యకర్త, ఉపాధ్యాయురాలు సోనమ్ వాంగ్‌చుక్, రాబోయే హిల్ కౌన్సిల్ ఎన్నికలకు ముందు రాజ్యాంగంలోని ఆరవ షెడ్యూల్‌లో లడఖ్‌ను చేర్చే హామీని బిజెపి నెరవేర్చాలని గతంలో నొక్కి చెప్పారు.
లడఖ్‌కు రాష్ట్ర హోదా, ఆరవ షెడ్యూల్ భద్రతల కోసం డిమాండ్ చేస్తున్న లడఖ్ ప్రజలు ఈ నిరసనకు నాయకత్వం వహిస్తున్నారు. ఈ అంశంపై నిర్ణయం తీసుకోవడానికి కేంద్ర ప్రభుత్వం అక్టోబర్ 6వ తేదీని నిర్ణయించిందని, అయితే అంత‌కంటే ముందుగానే పరిష్కరించాలని ఆందోళనకారులు డిమాండ్ చేస్తున్నారు. తక్షణమే చర్యలు తీసుకోవాలన్నదే మా డిమాండ్ అని నిరసనకు దిగిన నాయకుడు ఒకరు తెలిపారు. లడఖ్ ప్రజలు ఇక వేచి ఉండలేరన్నారు.
