త‌ప్ప‌తాగి వ్య‌క్తిని ఢీకొట్టి.. 3 కిలోమీటర్లు బానెట్‌పై తీసుకెళ్లిన‌ ఎంపీ కారు డ్రైవర్

ఆదివారం నాడు ఢిల్లీలోని ఆశ్రమ్ చౌక్ నుండి నిజాముద్దీన్ దర్గా వరకు దాదాపు రెండు మూడు కిలోమీటర్ల మేర ఓ వ్యక్తిని కారు బానెట్‌ పైనే ఉంచి తీసుకునివెళ్లాడు. కారు బీహార్‌కు చెందిన లోక్‌సభ ఎంపీ చందన్‌సింగ్‌కు చెందినదని.. అతని డ్రైవర్ ఈ పని చేశాడని పోలీసులు తెలిపారు. ఘటన జరిగినప్పుడు కారులో ఎంపీ లేరని తెలిపారు.

బాధితుడి పేరు చేతన్. అతడు క్యాబ్ డ్రైవర్ అని పోలీసులు తెలిపారు. ఒక ప్యాసింజర్​ను దింపి వస్తుండగా చేతన్ క్యాబ్​ను ఎంపీ కారు డ్రైవర్ మూడుసార్లు ఢీకొట్టాడు. దీంతో అతడు కారు దిగి ఎంపీ కారుకు అడ్డంగా నిలబడ్డాడు. ఆ కారు డ్రైవర్ వేగాన్ని పెంచి చేతన్​ను ఢీకొట్టాడు. దీంతో అతడు బానెట్​పై పడిపోయాడు. కారు ఆపాలని చేతన్ అరుస్తున్నా ఎంపీ కారు డ్రైవర్ పట్టించుకోలేదు. పోలీసులు గమనించి కారును ఓవర్ టేక్ చేసి ఆపడంతో అతడు బయటపడ్డాడు. ఎంపీ కారు డ్రైవర్ పూర్తిగా తాగున్నాడని చేతన్ చెప్పుకొచ్చాడు. నిందితుడు ఈ ఆరోపణలను తోసిపుచ్చాడు. క్యాబ్ డ్రైవర్ కావాలని బానెట్ పైకి దూకాడని అంటున్నాడు.